سندھ پولیس کے باکسر نے عالمی باکسنگ کا اعزاز اپنے نام کرلیا

کراچی(اسٹاف رپورٹر)بنکاک میں عالمی باکسنگ کے مقابلے میں سندھ پولیس سے وابستہ ایشین باکسنگ کے چار بار کے چیمپئن شہیر آفریدی نے افریقہ سے تعلق رکھنے والے باکسنگ کے عالمی چیمپئن پیٹرک الوئیٹے کو چھٹے راؤنڈ میں شکست دیکر عالمی باکسنگ کا اعزاز اپنے نام کرلیا۔ اس مقابلے سے قبل شہیر آفریدی نے مجموعی طور پر باکسنگ کے 14 جبکہ پیٹرک الوئیٹے نے 50 مقابلوں میں حصہ لیا ہے۔اس مقابلے میں کامیابی کے بعد شہیر آفریدی دنیا کے 100 بہترین پروفیشنل باکسر کی فہرست میں شامل ہوگئے ہیں اور یہ ابتک کی 16 ویں پروفیشنل فائٹ تھی۔علاوہ اذیں شہیر آفریدی مڈل ویٹ کیٹیگری میں عالمی باکسنگ کونسل اور ایسوسی ایشن جبکہ ایشین باکسنگ فیڈریشن کے ٹائٹل ہولڈر بھی ہیں۔آئی جی سندھ غلام نبی میمن نے باکسر شہیر آفریدی کے عالمی چیمپئن بننے پر مبارکباد دی۔