فرمان الہی
نماز کے اوقات
پشاور(سٹاف رپورٹر) جمعیت علمائے اسلام کے قائد مولانا فضل الرحمٰن نے کہا ہے کہ ہم کسی صورت دینی مدارس میں سرکاری مداخلت تسلیم نہیں کریں گے ،مدارس آزاد ہوں گے اور آزاد حیثیت سے کام کریں گے، اتحاد المدارس نے16دسمبر کو مشاورتی اجلاس طلب کیا ہےجس میں تمام مکاتب فکر کو اعتماد میں لیکر متفقہ لائحہ عمل کا اعلان کریں گے، ہم حکومت کو سدھرنے کا موقع دے رہے ہیں، اسلام آباد کی کال دیں گے تو ہم وہ لوگ نہیں تم ہمارا راستہ روک سکو گے،ہمیں دھمکیاں مت بھیجو، ڈرنے والے نہیں ہیں ، ہم بھاگنے اور واپس آنے والے نہیں ،تمہاری گولیاں ختم ہوجائیں گی ہمارے سینے ختم نہیں ہوں گے،جب سینیٹ اور قومی اسمبلی نے مدارس بل کی منظوری دیدی تو صدر نے دستخط کیوں نہیں کئے؟ کیا یہ فراڈ اور دھوکہ نہیں؟، ہمیں دھمکیاں مت بھیجو، ہم ڈرنے والے نہیں، تم شرافت میں رہو گے تو ہم بھی شرافت میں رہیں گے اگر بدمعاشی کرو گے تو ہم سے بڑا بدمعاش کوئی نہیں، جب سینیٹ اور قومی اسمبلی نے اتفاق رائے سے مدارس بل کی منظوری دی ہے تو صدر پاکستان نے دستخط کیوں نہیں کئے؟ کیا یہ فراڈ اور دھوکہ نہیں؟۔ان خیالات کا اظہار انہوں نے پشاور میں اسرائیل مردہ باد کانفرنس سے خطاب کرتے ہوئے کیا، حماس کے مرکزی رہنما ڈاکٹر ناجی ظہیر ، جمعیت علمائے اسلام کے قائدین مولانا عبدالغفور حیدری، مولانا راشد محمود سومرو، اسلم غوری، مولانا امجد خان، مولانا عطا الرحمٰن، مولانا اسعد محمود اور دیگر نے بھی خطاب کیا۔
