• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

خضدار پولیس لائن کا واقعہ بلوچی اقدار کی توہین ہے، امیر حمزہ خان زہری

میرا شہر
کوئٹہ
07 فروری ، 2025
کوئٹہ/اسلام آباد (آن لائن)مشیر وزیراعلی بلوچستان نوابزادہ امیر حمزہ زہری نے پولیس لائن خضدار میں ہونے والے افسوس ناک واقعہ پر شدید رد عمل کا اظہار کرتے ہوئے اس کی شدید الفاظ میں مذمت کی ہے اور کہا ہے کہ یہ واقعہ انسانی حقوق کی سنگین خلاف ورزی، بلوچی روایات کی توہین ہے۔ اس کھناؤنے جرم کے مرتکب افراد کو بلوچی رسم و رواج اور قانون کے مطابق ان کے انجام تک پہنچایا جائے گا۔ انہوں نے کہا کہ متاثرہ خاتون ان کی بہنوں کی طرح، ان کی عزت میری عزت ہے۔ میں اور میرے والد نواب ثنا اللہ خان زہری جھالاوان اور بلوچستان میں بسنے والی تمام ماؤں بہنوں کی عزتوں کے محافظ ہیں۔ عورتوں کی عزت کے حوالے سے ہمارے آباو اجداد ایک تاریخ رکھتے ہیں جس کے بابا بلوچستان میر غوث بخش بزنجو مرحوم چشم دید گواہ تھے ۔ تخت جھالاوان بلوچی روایات کا امین اور محافظ ہے۔ اس واقعہ میں ملوث ملزمان کو قبائلی رسم و رواج کے مطابق ایسی سخت سزائیں دیں گے جو تاریخ میں ہمیشہ یاد رکھی جائے گی۔ انہوں نے کہا کہ اس افسوسناک واقعہ کی آڑ میں بلا تحقیق چیف آف جھالاوان نواب ثنا اللہ خان زہری اور تخت جھالاوان انجیرہ کے خلاف سوشل میڈیا پر مہم چلانا بہت افسوس ناک عمل ہے۔ میرے والد بڑے دل والے انسان ہیں انہوں نے اپنے دشمنوں کی خواتین اور بچوں کو جیل میں رکھنا گوارا نہیں کیا بلکہ سخت ترین اسٹینڈ لے کر ان خواتین اور بچوں کو سیکورٹی اداروں کے چنگل سے آزاد کرا کے احترام اور عزت کے ساتھ ان کے گھروں کو روانہ کر دیا ۔ انہوں نے کہا کہ جھالاوان کے عوام مطمئن ر ہیں ملزمان قانون کی گرفت سے نہیں بچیں گے۔
کوئٹہ سے مزید