فرمان الہی
نماز کے اوقات
راولپنڈی (نمائندہ جنگ، نیوز ایجنسیاں ) بانیٔ پی ٹی آئی عمران خان نے کہا ہے کہ 26 ویں ترمیم کے بعد عدالتوں کو کنٹرول کیا جارہا ہے۔
عمران خان نے اپنے بیان میں کہا کہ آرمی چیف کو خط اس لیے بھیجے کیونکہ تمام جمہوری راستے ختم کر دیے گئے ہیں، میں نے اپنی ٹیم کو بھی کہہ دیا کہ بات چیت کا کوئی فائدہ نہیں۔
انہوں نے آئندہ ہفتے آرمی چیف جنرل عاصم منیر کو ایک اور کھلا خط لکھنے کا اعلان کیا ہے۔
بانیٔ پی ٹی آئی نے گزشتہ روز توشہ خانہ ٹو کیس کی سماعت کے موقع پر صحافیوں سے غیر رسمی گفتگو کرتے ہوئے کہا کہ پہلے سنسر شپ تھی اب پیکا بھی آگیا اور سوشل میڈیا کو بھی روک دیا گیا۔
اُنہوں نے کہا کہ پارلیمان فنکشنل نہیں، یہ فراڈ پارلیمنٹ ہے، وزیراعظم، صدر اور وزرا ء سب جعلی ہیں، پارلیمنٹ سے کوئی امید نہیں تھی کہ حکومت سے بات چیت کرکے کوئی کامیابی حاصل ہو گی۔
عمران خان کا کہنا تھا کہ ہم نے 8 فروری کا نہیں کہا، صرف 9 مئی اور 26 نومبر کے لیے جوڈیشل کمیشن بنانے کا کہا تھا لیکن ان کے صرف 2 مقاصد ہیں، ایک 8 فروری کی دھاندلی نہ کھلے اور دوسرا مقصد یہ ہے کہ پی ٹی آئی کے لوگوں کو جیلوں میں رکھیں تو ایسے میں بات چیت کا کیا فائدہ؟
انہوں نے مزید کہا کہ پاکستان میں جمہوریت آج ختم ہو چکی، ورلڈ جسٹس پروجیکٹ کے رول آف لاء انڈیکس میں پاکستان کا نمبر 142 میں سے 140 ہے، 26 ویں آئینی ترمیم کے بعد عدلیہ کا قتل عام کر دیا گیا ہے، میں جسٹس یحییٰ آفریدی کو کہنا چاہتا ہوں کہ قوم آپ کی طرف دیکھ رہی ہے۔
