فرمان الہی
نماز کے اوقات
برطانیہ کی مقامی عدالت نے بیلف بن کر کال کرنے والے دھوکے بازوں سے ہوشیار رہنے کا انتباہ جاری کیا ہے اور کہا ہے کہ فراڈیوں کی کال موصول ہونے پر عدالت کے اصل نمبروں پر رابطہ کریں۔
برطانیہ میں فراڈ کے ذریعے لوگوں سے رقم بٹورنے کا سلسلہ تو ہمیشہ سے جاری ہے، اب ان فراڈیوں نے بیلفس بن کر لوگوں کی رقم ہتھیانے کا نیا طریقہ ڈھونڈ لیا ہے۔
برطانوی میڈیا کے مطابق فراڈ کرنے والے بیلفس بن کر قرض کی عدم ادائیگی کے سبب گھر کا سامان اٹھانے کی دھمکی دیتے ہیں اور ساتھ ہی صورتِ حال سے بچنے کے لیے مقامی عدالت کے بوگس نمبر بھی فراہم کرتے ہیں۔
بعد ازاں جعلی عدالتی نمائندہ لوگوں کو رقم جلد ادا کرنے کے لیے آمادہ کرنے کی کوشش کرتا ہے۔
برطانوی میڈیا میں شائع رپورٹ کے مطابق نارتھمبر لینڈ کے پال اور چیشائر کی وکٹوریہ کو لوٹنے کی کوشش کی گئی لیکن وہ بر وقت حاضر دماغی کے سبب لُٹنے سے بچ گئے۔
منسٹری آف جسٹس نے اس پر اپنا ردِعمل دیتے ہوئے کہا ہے کہ بیلف بن کر کال کرنا جرم ہے، ایسی کال موصول ہونے پر اسے بند کر دیں اور مقامی کورٹ کے درست نمبر پر کال کریں۔
