فرمان الہی
نماز کے اوقات
کراچی (نیوز ڈیسک) چیئرمین پاکستان پیپلزپارٹی بلاول بھٹو زرداری نے کہا ہے کہ پاکستان اب ایک اور مارشل لا کا متحمل نہیں ہوسکتا ہے، بینظیر بھٹو نے پاکستان میں خواتین کو آگے آنے کیلئے راستہ فراہم کیا، آج پنجاب کی وزیراعلیٰ بھی ایک خاتون ہیں، آکسفورڈیونیورسٹی یونین کے تحت شہید بےنظیر بھٹو میموریل لیکچر پروگرام سے خطاب کرتے ہوئے بلاول بھٹو زرداری نے کہا کہ پاکستان کا مستقبل آئین کی بالادستی، آزاد عدلیہ اور صحافت سے وابستہ ہے، پاکستان کے عوام بہتر مستقبل کا مطالبہ کرنے کیلئےحق بجانب ہیں۔انہوں نے کہا کہ جمہوریت کے فوائد لوگوں تک پہنچانے کیلئے بےنظیر بھٹو کی کاوشیں قابل قدر ہیں، میری والدہ بےنظیر بھٹو 16 برس کی عمر میں آکسفورڈ پڑھائی کیلئے آئیں۔بلاول بھٹو زرداری نے کہا کہ بےنظیر بھٹو 25 برس کی عمر میں پاکستان کی سیاست میں حصہ لینے گئیں، بےنظیر غیرمعمولی خاتون تھیں۔والدہ نے بدلہ لینا نہیں سکھایا اسی لئے کہتا ہوں جمہوریت بہترین انتقام ہے، خواتین پر عائد پابندیوں کے باوجود بےنظیر بھٹو ملک کی وزیراعظم بنیں، بےنظیربھٹوکوحملوں میں نشانہ بنانےکی کوشش کی گئی۔بلاول زرداری نے کہا کہ بےنظیر بھٹو خوفزدہ ہوئے بغیر سیاست میں حصہ لیتی رہیں، ان کی زندگی پاکستان کا کل بہتر بنانے کیلئے وقف ہوئی، بےنظیر بھٹو تمام ترمخالفت کے باوجود پاکستان کو آگے لے جانے کیلئے سرگرم رہیں۔ وسیع پیمانے پر خطاب کے دوران بلاول نے پاکستان کے جوہری پروگرام کا بھی دفاع کیا، انہوں نے جوہری ہتھیاروں کے حوالے سے مغربی دوہرے معیارات پر تنقید کی، انہوں نے کہا کہ یہ منافقت ہے، وہ کون سے اصول ہیں جو کسی کو میزائل یا ایٹمی ہتھیار بنانے کا حقدار بناتے ہیں؟ کیا یہ کہ ہر مغربی یا سفید فام ملک کو جوہری ہتھیاروں کی اجازت ہے اور دوسروں کو نہیں؟ انہوں نے کہا کہ پاکستان کا ایٹمی ہتھیاروں کا جارحانہ پروگرام نہیں ہے۔بظاہر امریکی صدر ڈونلڈ ٹرمپ پر بھی تنقید کرتے ہوئے انہوں نے کہا ہمارے پاس پاناما کینال پر قبضہ کرنے یا کینیڈا کو فتح کرنے کی توسیع پسندانہ پالیسی نہیں ہے۔ ہمارے ایٹمی ہتھیار صرف اپنے دفاع کے لئے ہیں۔‘‘ پاکستان کے بیلسٹک میزائل پروگرام پر امریکی پابندیوں پر تشویش کا اظہار کرتے ہوئے بلاول نے سوال کیا کہ جب ملک بین الاقوامی قوانین کی مکمل پاسداری کر رہا ہو تو کسی ملک کی دفاعی صلاحیتوں کا تعین کرنے کا اختیار کس کے پاس ہے۔ بلاول نے ملک کے مستقبل کے لیے جمہوری طرز حکمرانی، آزاد عدلیہ اور آزاد صحافت کی اہمیت پر زور دیا۔ انہوں نے کہا کہ پاکستان کے عوام بہتر مستقبل کا مطالبہ کرنے میں حق بجانب ہیں۔
