فرمان الہی
نماز کے اوقات
اسلام آباد (فاروق اقدس) امریکی صدر ڈونلڈ ٹرمپ کی جانب سے غیر قانونی تارکین وطن کی واپسی کی پالیسی پر تیزی سے عملدرآمد ہو رہا ہے اور دیگر ممالک کے علاوہ بھارت کے ساتھ ساتھ امریکہ نے غیر قانونی طور پر سکونت پذیر پاکستانی تارکین وطن کو واپس بھیجنے کا سلسلہ بھی شروع کر رکھا ہے۔ اسلام آباد میں سفارتی ذرائع کے مطابق پاکستانی غیر قانونی تارکین وطن کو لیکر دوسرا امریکی جہاز امکانی طور پر آئندہ ہفتے پاکستان پہنچے گا۔ امریکا میں پاکستانی سفارتخانے کے ذرائع نے تصدیق کی ہے کہ امریکی جہاز میں 8 مزید پاکستانی غیر قانونی تارکین وطن ملک واپس پہنچیں گے۔ آئندہ ہفتے ڈی پورٹ ہونے والے صرف 2پاکستانیوں کا مجرمانہ ریکارڈ موجود ہے۔ غیرقانونی طور پر مقیم ملک بدر کئے جانے والے افراد کی دستاویزات کے مطابق 6پاکستانی شہریوں کا کوئی مجرمانہ ریکارڈ نہیں ہے، 2پاکستانی شہریوں کا ریپ اور منشیات کا ریکارڈ ہے، غیر قانونی تارکین وطن میں رحمان، سلیم، نواز، سلمان، عظیم، خان، خالد مسیح بھی شامل ہیں۔ ان شہریوں کو خصوصی امریکی فوجی طیارے سے پاکستان کے نور خان ایئربیس پر پہنچایا جائے گا۔ قبل ازیں56سالہ سید رضوی کو امریکا سے 25 فروری کو ملک بدر کیا گیا تھا۔
