فرمان الہی
نماز کے اوقات
اسلام آ باد ( نمائندہ جنگ) وزیر اعظم نے گھریلو صنعت و چھوٹے کاروبار سے منسلک خواتین کو اسمال اینڈ میڈم اینٹرپرائز سیکٹر (SME) میں شامل کرنے کا فیصلہ کیا ہے، یہ فیصلہ ہفتہ کے روز اسمال اینڈ میڈم انٹرپرائز ڈویلپمنٹ اتھارٹی (SMEDA) کے تحت جاری اصلاحات پر منعقدہ جائزہ اجلاس میں کیا گیا۔ جبکہ عالمی یوم خواتین کے موقع پر تقریب سے خطاب کرتے وزیراعظم نے کہا کہ خواتین کے حقوق کو یقینی بنانا ہمارا مشن ہے۔ اس موقع پر وزیر اعظم نے ورکنگ ویمنز انڈومنٹ فنڈ قائم کرنے کا اعلان کیا۔ تفصیلات کے مطابق اجلاس سے خطاب کرتے ہوئے وزیرِ اعظم نے گھریلو صنعت سے منسلک کاروباری خواتین کو کاروبار میں اضافے کیلئے ضروری سرمائے اور سہولیات کی ترجیحی بنیادوں پر فراہمی کی ہدایت کی۔وزیرِ اعظم نےیوتھ لون اسکیم سے خواتین کو کم لاگت قرضوں کی فراہمی کیلئے اقدامات کی ہدایت کی ۔ وزیرِ اعظم نےدیہی و دور دراز علاقوں میں تعلیم یافتہ و ہنر مند خواتین کو اپنے کاروبار سے با اختیار بنانے کیلئے اقدامات کی ہدایت کی۔ وزیرِ اعظم نے گھریلو صنعت سے منسلک خواتین کے کاروبار میں اضافے کیلئے انہیں ضروری تربیت کی فراہمی اور اس حوالے سے سہولت مراکز قائم کی ہدایت کی ۔وزیر اعظم نے ہدایت کی کہ گھریلو و چھوٹے کاروبار سے منسلک خواتین کے سہولت مراکز و تربیتی سینٹرز تک خواتین کی رسائی یقینی بنائی جائے۔وزیرِ اعظم نے گھریلو و چھوٹے پیمانے پر کاروبار سے منسلک خواتین کو با اختیار بنانے کے حوالے سے جامع لائحہ عمل و سفارشات مرتب کرنے کیلئے کمیٹی قائم کر دی۔ کمیٹی خواتین کو اپنے کاروبار کے ذریعے با اختیار بنانے کیلئے ضروری اقدمات پر سفارشات جلد وزیرِ اعظم کو پیش کرے گی۔ وزیر اعظم نے اس موقع پر کہا کہ پاکستان کی تقریباً نصف آبادی خواتین پر مشتمل ہے، خواتین کو با اختیار اور معاشی طور پر مستحکم کرنے کیلئے حکومت ترجیحی بنیادوں پر اقدامات کر رہی ہے۔ انہوں نے کہا کہ خواتین کو باوقار روزگار اور اپنے کاروبار کی فراہمی کیلئے حکومت تمام تر ضروری وسائل و تربیت فراہم کریگی۔ وزیرِ اعظم کو سمیڈا کے تحت مائیکرو، سمال اور میڈیم اینٹرپرائز کی ترقی کیلئے اقدامات پر بریفنگ دی گئی۔ اجلاس میں وفاقی وزراء ڈاکٹر مصدق ملک، احد خان چیمہ، شزہ فاطمہ خواجہ، معاون خصوصی ہارون اختر، چیئرمین وزیرِ اعظم یوتھ پروگرام رانا مشہود احمد خان اور متعلقہ اعلی حکام نے شرکت کی۔
