فرمان الہی
نماز کے اوقات
اسلام آباد (نمائندہ خصوصی) صدر مملکت آصف علی زرداری نے کہا ہے کہ پاکستان پیپلز پارٹی اپنے ویژن کے تحت عام لوگوں کو با اختیار بنانا چاہتی ہے، بے نظیر ہنر مند پروگرام کے تحت کمپیوٹر ٹیکنالوجی سمیت جدید تعلیم اور ہنر سکھائے جائیں گے تاکہ وہ اپنے خاندان کی کفالت اور قوم کی خدمت کرسکیں۔ ان خیالات کا اظہار انہوں نے ہفتہ کو یہاں ایوان صدر میں بے نظیر ہنر مند پروگرام کے اجراء کی تقریب سے خطاب کرتے ہوئے کیا۔ تقریب میں خاتون اول آصفہ بھٹو زرداری، گورنر پنجاب سردار سلیم حیدر خان، وفاقی وزراء، اراکین پارلیمنٹ، بے نظیر انکم سپورٹ پروگرام کی چیئرپرسن سینیٹر روبینہ خالد اور غیر ملکی سفیروں سمیت اہم شخصیات نے شرکت کی- اس موقع پر صدر مملکت نے خاتون اول آصفہ بھٹو زرداری کے ہمراہ بے نظیر ہنر مند پروگرام کا باضابطہ اجراء کیا۔ صدر مملکت آصف علی زرداری نے کہا کہ ہم جدید ٹیکنالوجی کو لوگوں تک منتقل کرنا چاہتے ہیں ، پاکستان پیپلز پارٹی اپنے وژن کے تحت عام لوگوں کو باختیار بنانا چاہتی ہے ، ہنر مند پروگرام کے ذریعے جرمن اور چینی زبانیں بھی سکھائی جائیں گی، انہوں نے سندھ میں نرسنگ کی تربیت حاصل کرنے والوں کی مالی امداد کا بھی ذکر کیا۔ صدر مملکت نے کہا کہ 2008 میں جب ہم نے بے نظیر انکم سپورٹ پروگرام کا آغاز کیا تو اس وقت کے وزیر خزانہ سید نوید قمر کی کاوشیں اس پروگرام کے اجراء میں شامل تھیں جس پر انہیں خراج تحسین پیش کرتے ہیں آج اس پروگرام سے لاکھوں خاندان مستفید ہورہے ہیں ، بے نظیر انکم سپورٹ پروگرام کے تحت بچوں اور بچیوں کو تعلیم سمیت تمام حقوق فراہم کیے جارہے ہیں، بیرون ملک ہنر مند افرادی قوت کی مانگ ہے، نرسنگ جیسے باوقار شعبہ میں پاکستانی تربیت یافتہ نرسز باعزت روزگار کماسکتی ہیں، نرسنگ کے شعبہ میں اعلیٰ تربیتی معیار قائم کرنا ہوگا- اس شعبے کے لیے عالمی معیارات کو تربیتی عمل میں شامل کرنا ہوگا۔ قبل ازیں بے نظیر انکم سپورٹ پروگرام کی چیئرپرسن سینیٹر روبینہ خالد نے تقریب سے خطاب کرتے ہوئے کہا کہ بے نظیر ہنر مند پروگرام ایک وعدے کی تکمیل ہے- بے نظیر ہنر مند پروگرام کے ذریعے نوجوانوں کا مستقبل محفوظ بنایا جائے گا، اس پروگرام کے ذریعے نوجوانوں کو جدید ہنر سکھائے جائیں گے۔
