• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

سندھ بھر میں تعلیمی اداروں میں اسکاؤٹ یونٹ کا قیام لازمی قرار دیا جائے، چیف جسٹس سندھ ہائیکورٹ

آج کا اخبار
اہم خبریں
02 اگست ، 2025
کراچی (اسٹاف رپورٹر)قائم مقام چیف جسٹس سندھ ہائیکورٹ جسٹس ظفر احمد راجپوت نے کہا ہے کہ سند بھر کے تعلیمی اداروں میں اسکاؤٹ یونٹ کا قیام لازمی قراردیا جائے تاکہ ہم مستقبل کے لیئے اچھے معمار تیار کر سکیں۔وہ سندھ بوائے اسکاؤٹس ایسوسی ایشن کے زیر اہتمام اسکاؤٹس آڈیٹوریم میں جشن آزادی کی تقریبات کے افتتاح کے موقع پر منعقدہ اسکارف ڈے کی تقریب سے بحیثیت مہمان خصوصی خطاب کر رہے تھے ۔تقریب سے صوبائی کمشنر جسٹس ریٹائرڈ حسن فیروز اور صوبائی سیکرٹری سید اختر میر نے بھی خطاب کیا ۔ اس موقع پرجسٹس (ر) شاہنواز طارق، ڈی جی کالجز پروفیسر نوید رب، انٹرمیڈیٹ بورڈ کراچی کے سابق ناظم امتحانات عمران چشتی، انور علی بھٹی ،فرقان یوسفی اور دیگر بھی موجود تھے۔ چیف جسٹس نے مزید کہا کہ اسکاؤٹس مستقبل کے معمار ہیں انہیں چاہے کہ اچھے معاشرے کی تشکیل کے لئے بنیان المرصوص کو مشعل راہ بنائیں تاکہ قوم ایک سیسہ پلائی ہوئی دیوار کی طرح معرکہ حق کیلئے متحد ہو جائے ۔ انھوں نے مزید کہا کہ اسکاؤٹس معاشرے میں خاموش رہ کر جو خدمات انجام دے رہے ہیں ایک دن ضرور انہیں اس کا صلہ ملے گا ، صوبائی اسکاؤٹ کمشنر جسٹس (ر) حسن فیروز کا کہنا تھا کہ آج سے ملک بھر میں معرکہ حق جشن آزادی تقریبات کا آغاز کیا جارہا ہے۔ اس سلسلے میں سندھ بوائےاسکاؤٹس ایسوسی ایشن نےورلڈاسکارف ڈے مناکرجشن آزادی کی تقریبات کاآغاز کیا ہےجوخوش آئندبات ہے۔ اسکاؤٹس تحریک سے وابستہ نوجوان مستقبل کے معمار ہیں وقت پڑنے پریہ نوجوان وطن کی حفاظت کے لیئے سیسہ پلائی ہوئی دیوار ثابت ہوسکتے ہیں۔صوبائی اسکاؤٹس سیکریٹری سید اختر میر نے کلمات استقبالیہ ادا کرتے ہوئے اسکاؤٹ اسکارف کی تاریخ پر روشنی ڈالی اور کہا کہ نوجوانوں کو با کرداربنانا اور مفید ہونا بہت ضروری ہے جو اسکاؤٹ تحریک کی تربیت کے ذریعہ ہی ممکن ہے۔ تقریب میں مہمان خصوصی سندھ ہائی کورٹ کے قائم مقام چیف جسٹس ظفر احمد راجپوت کو صوبائی اسکاؤٹ کمشنر جسٹس (ر) حسن فیروز ، صوبائی سیکریٹری سید اختر میر اسکارف پہنایا اور انہیں شیلڈ پیش کی اس موقع پر جسٹس حسن فرروز نے جسٹس (ر) شاہنواز طارق کو اسکارف پہنایا،تقریب میں اسکاؤٹ وعدہ دہرانے کے ساتھ ساتھ ملی نغمات بھی پیش کئے گئے ۔ واضح رہے کہ سندھ بوائے اسکاؤٹس ایسوسی ایشن کے زیر اہتمام 14 روزہ معرکہ حق جشن آزادی تقریبات کےسلسلے کی یہ پہلی کڑی تھی۔
اہم خبریں سے مزید