فرمان الہی
نماز کے اوقات
فرانس میں پاکستان کی سفیر ممتاز زہرہ بلوچ نے اینی لاور ڈیس کامبن کی دعوت پر انٹرنیشنل ولیج آف گیسٹرونومی پیرس کا دورہ کیا۔
سفارت خانہ سے جاری بیان کے مطابق یہ پیرس میں 2016ء کے بعد گیسٹرونومی کی منعقدہ سب سے بڑی تقریبات میں سے ایک ہے اور اس کا مقصد دنیا بھر سے کھانے کی بھرپور روایات کو منانا ہے۔
پاکستان پویلین کا افتتاح کرتے ہوئے سفیر ممتاز زہرہ بلوچ نے پاکستان کے بھرپور ثقافتی ورثے پر روشنی ڈالی اور دنیا بھر کے ممالک کے کھانوں اور ثقافتوں کو فروغ دینے کے لیے بین الاقوامی گیسٹرونومی فیسٹیول کے انعقاد کی روایت کو سراہا۔
اس سال کے میلے میں پاکستان کی شرکت سفارت خانہ کی جانب سے فرانس میں پاکستان کی ثقافت اور کھانوں کو مقبول بنانے کے وژن کے ساتھ عوامی سفارت کاری کے اقدامات کے سلسلہ کا حصہ ہے۔
فیسٹیول میں پاکستان کا پویلین توجہ کا مرکز بنا رہا جہاں کھانے کے شوقین پاکستانی کھانوں سے لطف اندوز ہوئے اور پاکستان کے روایتی کھانوں کے بارے میں جاننے کے لیے بڑی تعداد میں آئے۔
نمائش میں موجود لوگوں نے لذیز اور میٹھے پکوانوں کے تنوع کو بھی سراہا، جن میں چکن بریانی، چنا چاٹ، چکن سیخ کباب، سبزی کے سموسے، گلاب جامن، جلیبی کے ساتھ ساتھ مشہور مشروب اور آم کا جوس شامل تھا۔
انہوں نے کھانا پکانے کے عمل، استعمال شدہ اجزاء اور پکوان کی ترکیب میں گہری دلچسپی ظاہر کی۔
اس سال پاکستان کا سفارت خانہ اس میگا ایونٹ میں تقریباً 62 دیگر ممالک اور فرانسیسی خطوں کے ساتھ شرکت کر رہا ہے، ایونٹ چار روز تک جاری رہے گا اور توقع ہے کہ روزانہ 10 ہزار سے زائد افراد اس میں شریک ہوں گے۔
سفیر ممتاز زہرہ بلوچ نے تقریب کے انعقاد میں سفارتخانہ کی ٹیم کے جذبے اور محنت کو بھی سراہا۔
