فرمان الہی
نماز کے اوقات
یونیورسٹی آف بریڈفورڈ کے عملے نے کورسز بند کرنے اور ملازمتوں میں کٹوتیوں کے خلاف تعلیمی سال کے آغاز پر مزید 10 روزہ ہڑتال کا اعلان کر دیا۔
یونیورسٹی اینڈ کالج یونین کے مطابق ہڑتال پیر 22 ستمبر سے جمعہ 3 اکتوبر تک صرف ورکنگ ڈیز (ہفتے کے کام کے دنوں) میں ہو گی۔
یونین کا کہنا ہے کہ اسٹاف کی 82 فیصد اکثریت نے بیلٹ میں ہڑتال کے حق میں ووٹ دیا، یہ احتجاج کیمسٹری اور فلم و ٹیلی ویژن کے کورسز بند کرنے کے فیصلے کے خلاف کیا جا رہا ہے۔
یونیورسٹی آف بریڈفورڈ کے ترجمان نے کہا ہے کہ ادارہ شعبہ جاتی مالی مشکلات کے پیشِ نظر اخراجات میں کمی کے لیے آپریشنز کا جائزہ لے رہا ہے، ہم یونین کے ساتھ مل کر کام کرنے کے لیے پرعزم ہیں اور جہاں ممکن ہو جبری برطرفیوں سے بچنے کی کوشش کریں گے۔
یونیورسٹی اینڈ کالج یونین نے مؤقف اختیار کیا ہے کہ فلم و ٹیلی ویژن کورس کو بند کرنے کا فیصلہ نامناسب ہے کیونکہ بریڈفورڈ دنیا کا پہلا یونیسکو سٹی آف فلم قرار پایا تھا اور اس سال برطانیہ کا سٹی آف کلچر بھی ہے۔
یونین کا یہ بھی کہنا ہے کہ یونیورسٹی کا اسکول آف کیمسٹری اینڈ بائیومیڈیکل سائنسز کامیاب اپرنٹس شپ پروگرامز چلا رہا ہے جو مقامی معیشت کے لیے ہنر مند افرادی قوت تیار کرنے میں اہم کردار ادا کر رہا ہے۔
یو سی یو کے مطابق کیمسٹری، بائیومیڈیکل سائنسز اور اسکول آف بلٹ انوائرنمنٹ، آرکیٹیکچر اینڈ کری ایٹیو انڈسٹریز کے 9 پروفیسرز اور 47 فل ٹائم لیکچررز کی ملازمتیں خطرے میں ہیں۔
یو سی یو کی جنرل سیکریٹری جو گریڈی نے کہا ہے کہ انتظامیہ کو اپنے عملے کی آواز سننی چاہیے، کٹوتیوں پر نظرِثانی کرنی چاہیے اور جبری برطرفیوں کو ختم کرنے کا اعلان کرنا چاہیے۔
انہوں نے خبردار کیا کہ اگر یونیورسٹی نے یہ اقدامات نہ کیے تو تعلیمی سال کے آغاز پر طلبہ کی پڑھائی متاثر ہو گی۔
