• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

یو اے ای کیلئے پاکستان کے نامزد سفیر شفقت علی خان آج ابوظہبی پہنچیں گے

آج کا اخبار
اہم خبریں
17 اکتوبر ، 2025
اسلام آباد (صالح ظافر) متحدہ عرب امارات (یو اے ای) کے لیے پاکستان کے نامزد سفیر ، سفیر شفقت علی خان، اپنی ذمہ داریاں سنبھالنے کے لیے 30اکتوبر بروز جمعرات کو ابوظہبی پہنچ رہے ہیں۔ باخبر سفارتی ذرائع نے بتایا کہ سفیر شفقت علی، جو اس وقت اسپیشل فارن سیکریٹری اور دفتر خارجہ کے ترجمان ہیں، وہ فیصل نیاز ترمذی کی جگہ لے رہے ہیں۔ ترمذی اپنے جانشین کی آمد سے قبل اسی ہفتے اسلام آباد واپس آ جائیں گے۔ ترمذی کو روس کے لیے سفیر تعینات کیا گیا ہے، اور وہ ہیڈ کوارٹرز سے بریفنگ حاصل کرنے کے بعد اگلے ماہ ماسکو کے لیے روانہ ہوں گے۔ دریں اثناء، حکومت نے سعودی عرب کے لیے نئے سفیر کی تقرری کا فیصلہ کیا ہے۔ اس سے قبل وہاں ایک ممتاز کیریئر ڈپلومیٹ، احمد فاروق، سعودی دارالحکومت ریاض میں اپنی مدت ملازمت مکمل کر چکے ہیں۔ امکان ہے کہ اگر کسی مناسب کیریئر ڈپلومیٹ کو شارٹ لسٹ نہ کیا گیا، تو نئے سفیر کا تقرر کسی سینئر کنٹریکچوئل افسر کے طور پر کیا جائے گا۔ ذرائع نے سوشل میڈیا پر واشنگٹن میں پاکستانی سفیر کی تبدیلی کے بارے میں پھیلائی جانے والی قیاس آرائیوں کی سختی سے تردید کی۔ ذرائع نے یاد دہانی کرائی کہ امریکہ میں پاکستان کے سفیر ڈاکٹر رضوان سعید شیخ، جو ایک باصلاحیت کیریئر ڈپلومیٹ ہیں، واشنگٹن کے لیے ملک کے سفیر کے طور پر اپنی ذمہ داریاں جاری رکھیں گے۔ دلچسپ بات یہ ہے کہ متحدہ عرب امارات نے بھی پاکستان کے لیے اپنا سفیر تبدیل کر دیا ہے اور اپنے سینئر ترین سفارت کاروں میں سے ایک سالم محمد الزعابی کو نیا سفیر مقرر کیا ہے ایک اور پیش رفت میں، متحدہ عرب امارات نے دونوں ممالک کے تعلقات کو مضبوط بنانے میں ان کی ممتاز سفارتی خدمات کے اعتراف کے طور پر، سفیر فیصل نیاز ترمذی کو فرسٹ کلاس آرڈر آف زید دوم کے اعزاز سے نوازا ہے۔ یہ اعلان جمعرات کو کیا گیا۔
اہم خبریں سے مزید