فرمان الہی
نماز کے اوقات
کراچی (اسٹاف رپورٹر) پاکستان کرکٹ بورڈ کا کہنا ہے کہ پی ایس ایل کے قواعد کے مطابق دو نئی ٹیموں کیلئے کامیاب بولی دہندگان کو حق ہوگا کہ وہ بولی کے طے شدہ طریقہ کار کے مطابق کسی شہر کے نام کو منتخب کریں۔ فرنچائز حقوق کیلئے ٹینڈر کا عوامی اشتہار 15 نومبر کو شائع کیا گیا تھا۔ ٹیکنیکل پروپوزلز جمع کرانے کی آخری تاریخ 15 دسمبر 2025 صبح 11 بجے ہے۔ پی ایس ایل کا آغاز 2016 میں پانچ ٹیموں کے ساتھ ہوا تھا، اور 2018 میں ملتان سلطانز کے اضافے کے ساتھ فرنچائزز کی تعداد 6 ہوگئی تھی جب کہ 2 مزید ٹیموں کی شمولیت 7 سال بعد پہلی بڑی تنظیم نو ہوگی اور مجموعی ٹیموں کی تعداد 8 تک پہنچ جائے گی۔ پی سی بی ترجمان کا کہنا ہے کہ فرنچائز کا نام منتخب کرنا مالک کا اختیار ہوگا اور اس حوالے سے حتمی فیصلہ 15 دسمبر کے بعد کیا جائے گا۔ گزشتہ ہفتے پی ایس ایل نے تصدیق کی تھی کہ نئی دو فرنچائز ٹیموں کے نام حیدرآباد، راولپنڈی، فیصل آباد، گلگت، مظفرآباد اور سیالکوٹ میں سے منتخب کیے جائیں گے۔ یہ فہرست نئی ٹیموں کی ویلیوایشن رپورٹس پی سی بی کو ملنے کے بعد طے کی گئی تھی ۔ اُن خبروں کی تردید کی جاتی ہے جن میں پی ایس ایل فرنچائزز کیلئے دو شہروں کے نام فائنل ہونے کا دعویٰ کیا جا رہا ہے۔
