فرمان الہی
نماز کے اوقات
کراچی ( اسٹاف رپورٹر)وزیراعلیٰ سندھ سید مراد علی شاہ نے سندھ کی تقسیم کو یکسر مسترد کرتے ہوئے کہا کہ نئے صوبوں کی بات ایک کان سے سنیں اور دوسرے سے نکال دیں،انہوں نے یہ بات پورٹ گرانڈ میں منعقدہ سندھ کرافٹ فیسٹیول میں میڈیا سے گفتگو کرتے ہوئے کہی، جہاں انہوں نے صوبائی حکومت کی جانب سے سندھ کی روایتی دستکاری اور فنون کے فروغ کے عزم پر زور دیا۔ وزیر اعلیٰ نے کہا کہ ہماری توجہ اس بات پر ہے کہ سندھ کے ثقافتی کام اور دستکاری کو وہ پہچان اور حوصلہ افزائی ملے جس کے وہ مستحق ہیں۔نئے صوبوں کے قیام سے متعلق بار بار اٹھنے والی بحث پر تبصرہ کرتے ہوئے وزیر اعلیٰ نے ان باتوں کو مکمل طور پر رد کر دیا۔ انہوں نے ایک بار پھر کہا کہ نئے صوبوں کی بات ایک کان سے سنیں اور دوسرے سے نکال دیں، اللّٰہ کے سوا کسی میں سندھ کو تقسیم کرنے کی طاقت نہیں۔مراد علی شاہ نے کہا کہ پاکستان پیپلز پارٹی کے چیئرمین بلاول بھٹو زرداری پہلے ہی اٹھارہویں ترمیم میں تبدیلی اور این ایف سی ایوارڈ کے حصے میں کمی کی تجاویز کو رد کر چکے ہیں۔ انہوں نے مزید کہا کہ یہ معاملات مجوزہ ستائیسویں ترمیم میں بھی مسترد کر دیے گئے تھے۔ وزیر اعلیٰ نے دعویٰ کیا کہ پاکستان پیپلز پارٹی “خوابوں کو حقیقت میں بدلنے کا ہنر” رکھتی ہے۔سندھ میں گورنر کی تبدیلی سے متعلق سوال پر مراد علی شاہ نے واضح کیا کہ نہ ان کا اور نہ ہی صوبائی حکومت کا اس معاملے میں کوئی کردار ہے۔ انہوں نے کہا کہ گورنروں کی تقرری میں ہم سے مشورہ نہیں کیا جاتا۔
