فرمان الہی
نماز کے اوقات
اسلام آباد(اے پی پی)وفاقی وزیر خزانہ سینیٹر محمد اورنگزیب نے کہا ہے کہ پاکستان آئندہ چند ہفتوں میں چینی کیپٹل مارکیٹ میں پانڈا بانڈ جاری کرنے کے لیے تیار ہے‘پانڈا بانڈ کے اجرا سے پاکستان کو دنیا کی دوسری سب سے بڑی اور گہری کیپٹل مارکیٹ تک رسائی حاصل ہو گی جس سے امریکی ڈالر پر انحصار کم کرنے اور یورو و سکوک مارکیٹس کے ساتھ ساتھ فنانسنگ کے ذرائع کو متنوع بنانے میں مدد ملے گی‘پاک چین اقتصادی شراکت داری نئے مرحلے میں داخل ہوگئی ہے۔یہ بات انہوں نے چائنا گلوبل ٹیلی وژن نیٹ ورک کو انٹرویو دیتے ہوئے کہی ۔ وزیر خزانہ نے کہا کہ پاکستان اور چین کے دوطرفہ تعلقات مسلسل مضبوط، مستحکم اور متنوع ہو رہے ہیں اور اب یہ تعلقات صرف بنیادی ڈھانچے تک محدود نہیں بلکہ ایک وسیع مارکیٹ پر مبنی اقتصادی شراکت داری میں تبدیل ہو چکے ہیں۔وزیر خزانہ نے چین کو پاکستان کا سب سے بڑا تجارتی شراکت دار قرار دیتے ہوئے بتایا کہ رواں سال کے پہلے آٹھ ماہ میں دونوں ممالک کے درمیان تجارتی حجم تقریبا 17 ارب امریکی ڈالر تک پہنچ گیا ہے۔پاکستان کی اقتصادی ترقی میں چین کا کردار بالخصوص سی پیک کے ذریعے نہایت اہم رہا ہےجبکہ صدر شی جن پنگ اور وزیر اعظم لی چیانگ سے رواں سال ہونیوالی اعلی سطح ملاقاتوں کے بعد سی پیک کے دوسرے مرحلے کا باقاعدہ آغاز ہو چکا ہے‘سی پیک فیز ٹو میں موجودہ انفراسٹرکچر کو معاشی طور پرمؤثربنانے پر توجہ دی جا رہی ہے اور یہ مرحلہ زیادہ تر بزنس ٹو بزنس تعاون پر مبنی ہے جو نجی شعبے کی قیادت میں پائیدار ترقی کی جانب ایک واضح پیش رفت ہے۔
