فرمان الہی
نماز کے اوقات
اسلام آباد( رانا غلام قادر) وزیرِ اعظم محمد شہباز شریف نے زرعی برآمدات میں اضافے کیلئے لائحہ عمل بنانے کی ہدایت دیتے ہوئے کہا ہے کہ کسان حکومت کی اولین ترجیح ہیں ،وفاقی حکومت زرعی شعبے میں اپنے دائرہ کار میں اصلاحات کے ساتھ ساتھ صوبائی حکومتوں کے ساتھ مل کر زراعت کی ترقی کیلئے اقدامات کر رہی ہے،فی ایکڑ پیداوار میں اضافے کیلئے کسانوں کو معیاری بیج، مناسب قیمت پر بروقت کھاد اور بیماری کی روک تھام کیلئے ادویات کی فراہمی کیلئے اقدامات کئے جا رہے ہیں ،حال ہی میں چین میں سرکاری خرچ پر ایک ہزار پاکستانی طلباء و طالبات کو زراعت کی جدید ٹیکنالوجی کی تربیت کیلئے بھیجا گیا۔وزیر اعظم ان خیا لات کا اظہار ملکی زرعی برآمدات میں اضافے اور زرعی شعبے کو بین الاقوامی تقاضوں سے ہم آہنگ کرنے کے حوالے سے تشکیل کردہ نجی شعبے کے ماہرین پر مبنی ورکنگ گروپ کے اجلاس کی صدار ت کے دوران کیا۔ وزیر اعظم نےہدایت دی کہ ساحلی پٹی پر پام آئل کی پیداوار کیلئے پالیسی اقدامات تشکیل دے کر پیش کئے جائیں۔ آئندہ پانچ برس میں زرعی برآمدات بڑھانے کے حوالے سے لائحہ عمل تشکیل دیا جائے۔وزیرِ اعظم محمد شہباز شریف کی زیرِ صدارت زرعی شعبے کی اصلاحات پر تجاویز کے حوالے سے ورکنگ گروپ کا جائزہ اجلاس میں چیئرمین ورکنگ گروپ رانا نسیم اور انکی ٹیم نے ملکی زرعی شعبے پر جامع رپورٹ، شعبے کو درپیش مسائل اور آئندہ کے لائحہ عمل پر تفصیلی بریفنگ دی۔ اجلاس میں وفاقی وزراء احسن اقبال، رانا تنویر حسین، ڈاکٹر مصدق ملک، محمد اورنگزیب، عطاء اللہ تارڑ، وزیرِ مملکت بلال اظہر کیانی، معاونِ خصوصی ہارون اختر اور متعلقہ اعلی حکام نے شرکت کی۔
