• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ایران سے سرحدی تجارت پر پابندی ختم، لاپتہ افراد کا مسئلہ حل کیا جائے، حافظ نعیم

آج کا اخبار
اہم خبریں
26 جنوری ، 2026
لاہور(نمائندہ خصوصی)امیر جماعت اسلامی پاکستان حافظ نعیم الرحمٰن نے کہا ہے کہ بلوچستان کے مسائل کا حل صوبہ کے نوجوان کو تعلیم، روزگار کی فراہمی میں ہے، ایران سے سرحدی تجارت پر پابندی ختم کی جائے، لاپتہ افراد کا مسئلہ حل کیا جائے، آپریشن سے صوبہ کے مسائل ختم ہوں گے نہ ہی امن قائم ہوگا، بلوچ عوام کو حقوق نہیں ملیں گے تو عوام کا ریاست کے خلاف غم وغصہ فطری ہے۔ ان خیالات کا اظہار انہوں نے گوادر میں الخدمت فاؤنڈیشن پاکستان کے تحت بنو قابل تقریب سے خطاب کرتے ہوئے کہا۔ ہزاروں بچوں اور بچیوں نے بنو قابل کے تحت مفت آئی ٹی کورسز میں داخلے کیلئے امتحان دیا۔ انہوں نے کہا کہ بنوقابل کو وسعت دے کر زی کنیکٹ کی شکل دی گئی ہے، نوجوانوں کی اخلاقی تربیت اور کھیلوں کا فروغ بھی زی کنیکٹ کا حصہ ہے۔ حافظ نعیم الرحمن نے کہا کہ بلوچستان میں سکول جانے کے قابل پچاس فیصد بچے سکولوں سے باہر ہیں۔ بلوچ عوام کو حقوق نہیں ملیں گے تو عوام کا ریاست کے خلاف غم وغصہ فطری ہے۔ مسائل بندوق سے حل نہیں ہوتے، عوام کو ان کے حقوق دیے جائیں۔ امیر جماعت اسلامی نے کہا کہ سرحدی تجارت پر پابندی کی وجہ سے گوادر کے عوام کو بے شمار مسائل کا سامنا ہے، صوبہ میں سرحدی تجارت کو آئینی تحفظ دیا جائے۔
اہم خبریں سے مزید