• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

کراچی ریڈ زون میں باغ جناح کی آہنی گرل چوری کرنے والا گروہ سرگرم

آج کا اخبار
اہم خبریں
06 فروری ، 2026
کراچی( افضل ندیم ڈوگر )کراچی کے ریڈ زون میں ایوان صدر روڈ پر گورنر ہاؤس سے متصل باغ جناح پارک کی قیمتی اور آہنی گرل کاٹنے کر چوری کرنے کی وارداتیں یومیہ بنیادوں پر جاری ہیں۔ چور آہستہ آہستہ گورنر ہاؤس کی طرف بڑھ رہے ہیں۔ باغ جناح پارک کی از سرنو تعمیر سال 2013 میں اربوں روپے کی لاگت سے مکمل ہوئی تھی۔ اس وقت کے گورنر عشرت العباد خان نے 8 اکتوبر 2013 کو اس کا افتتاح کیا تھا۔ کچھ عرصہ بعد تک پارک کی حفاظت کیلئے سیکورٹی گارڈز تعینات رہے۔ مالی پارک کی خوبصورتی کو برقرار رکھتے رہے مگر گزشتہ کئی سالوں سے پارک تباہ حالی کا شکار ہے اور اس کا کوئی پرسان حال نہیں۔ اب گزشتہ چند ہفتوں سے چوروں نے ایوان صدر روڈ کی طرف سے ٹنوں وزنی گرل کاٹ کر چوری کرنے کا سلسلہ شروع کر رکھا ہے۔ ہر ایک دو دن بعد منوں وزنی آہنی گرل غائب ہو جاتی ہے۔ جمعرات کی شام تک تقریبا 200 میٹر تک کی گرل کاٹی جاچکی تھی۔ اس نمائندے نے دورہ کیا تو ضیاءالدین احمد روڈ پر باغ جناح کی پارکنگ کیلئے کے ایم سی کا عملہ پیسے وصول کر رہا تھا مگر اس اثاثے کی حفاظت کرنے والا کوئی نہیں تھا۔ ایک اہلکار کے مطابق ملزمان کو پکڑ کر پولیس کے حوالے بھی کیا جاتا ہے مگر دو تین دن بعد پولیس انہیں چھوڑ دیتی ہے اور وہ پھر چوری میں لگ جاتے ہیں۔ نشہ کے عادی افراد نے کراچی کا انفراسٹرکچر تباہ کرکے رکھ دیا ہے۔ پلوں کی آہنی گرلز، عمارتوں کے سریا، گیس سپلائی کی پائپ لائنیں تک چوری کی جارہی ہیں۔
اہم خبریں سے مزید