فرمان الہی
نماز کے اوقات
کراچی( ثاقب صغیر )سال 2015 کے بعد سے دنیا کی دو بڑی طاقتیں امریکہ اور چین اپنی اثر و رسوخ کی حدود میں کوئی نمایاں توسیع نہیں کر سکیں،عالمی زرمبادلہ کے ذخائر میں امریکی ڈالر کا حصہ سال 2000 میں 72 فیصد تھا جو اب گھٹ کر 60 فیصد سے بھی کم رہ گیا ہے،1991 کے بعد سے درمیانی طاقتوں (Middle Powers) کی تعداد تقریباً دوگنی ہو گئی ہے۔درمیانی سطح کی طاقتوں کا بڑھتا ہوا اثر آئندہ 20 سالوں میں عالمی سلامتی کے منظرنامے کو نمایاں طور پر تشکیل دے گا۔امریکی تھنک ٹینک انسٹیٹیوٹ فار اکنامکس اینڈ پیس (IEP) کی رپورٹ "دی گریٹ فریگمنٹیشن" کے مطابق چین کا "بیلٹ اینڈ روڈ انیشی ایٹو" قرضوں کے بوجھ تلے دبے شراکت دار ممالک کی مزاحمت کا سامنا کر رہا ہے۔اب ابھرتی ہوئی درمیانی طاقتیں کئی بڑی طاقتوں سے زیادہ مادی صلاحیت رکھتی ہیں۔متحدہ عرب امارات، انڈونیشیا اور ترکیہ سب سے متحرک درمیانی طاقتوں کے طور پر ابھرے ہیں۔متحدہ عرب امارات اب سب سہارن افریقہ (Sub-Saharan Africa) میں غیر ملکی سرمایہ کاری کا سب سے بڑا ذریعہ بن چکا ہے۔رپورٹ کے مطابق کچھ ابھرتی ہوئی طاقتیں جیسے ارجنٹینا، ڈنمارک، آسٹریلیا، نائیجیریا، سنگاپور، مصر اور تھائی لینڈ جلد درمیانی طاقتوں کے درجے تک پہنچنے کا امکان رکھتی ہیں۔یہ ابھرتی ہوئی طاقتیں اپنی سفارتی روابط اور اقتصادی اثر و رسوخ میں تیزی سے اضافہ کر رہی ہیں جس سے ان اور بڑی طاقتوں کے درمیان فرق کم ہو رہا ہے۔ جیسے جیسے درمیانی اور ابھرتی ہوئی معیشتیں عالمی جی ڈی پی میں زیادہ حصہ لینے لگیں، بڑی طاقتوں کے لیے ان کے رویے کو متاثر کرنا مشکل ہوتا جا رہا ہے۔رپورٹ کے مطابق جن ممالک کی معیشت تیزی سے ترقی کر رہی ہے جیسے بھارت، انڈونیشیا، متحدہ عرب امارات اور کسی حد تک سعودی عرب اور ترکیہ،وہ اپنا عالمی اثر مزید بڑھانے کے زیادہ امکانات رکھتے ہیں۔درمیانی سطح کی طاقتوں کا بڑھتا ہوا اثر آئندہ 20 سالوں میں عالمی سلامتی کے منظرنامے کو نمایاں طور پر تشکیل دے گا۔یہ رپورٹ انسٹیٹیوٹ فار اکنامکس اینڈ پیس (IEP) نے تیار کی ہے جو سرد جنگ کے اختتام کے بعد بین الاقوامی نظام میں آنے والی ساختی تبدیلیوں کا جامع اور اعداد و شمار پر مبنی تجزیہ پیش کرتی ہے۔۔رپورٹ میں بتایا گیا ہے کہ آج کے دور میں جیو پولیٹیکل خطرات سرد جنگ کے زمانے کے مقابلے میں کہیں زیادہ ہیں۔اس کی ایک بڑی وجہ عسکری اخراجات میں اضافہ ہے جو 2024 میں ریکارڈ 2.7 ٹریلین ڈالر تک پہنچ گیا ہے اور بین الاقوامی اداروں کے کردار میں کمی بھی ایک اہم عنصر ہے۔رپورٹ کے مطابق اگرچہ امریکہ اور چین اب بھی دنیا کی دو بڑی سپر پاورز ہیں لیکن سال 2015 کے بعد سے ان کا جیوپولیٹیکل اثر جمود کا شکار ہے۔دونوں میں سے کوئی بھی اپنی اثرو رسوخ کی حدود میں خاطر خواہ توسیع کرنے میں کامیاب نہیں ہو سکا جس کی بنیادی وجوہات اندرونی چیلنجز اور زیادہ مسابقتی عالمی ماحول ہے۔رپورٹ کے مطابق بھارت کو چھوڑ کر باقی تمام بڑی طاقتیں معاشی جمود کے دور سے گزر رہی ہیں۔یورپی طاقتوں میں سے کسی کی بھی سالانہ معاشی ترقی 2.5 فیصد سے تجاوز کرنے کی توقع نہیں کی جا رہی جبکہ کچھ ممالک بھاری قرضوں کے بوجھ تلے دبے ہوئے ہیں۔اسی لیے روایتی بڑی طاقتیں اب اپنے کم ہوتے اثر و رسوخ کو بڑھانے کے لیے یورپی یونین (EU) اور نیٹو (NATO) جیسے ادارہ جاتی ڈھانچوں پر بڑھتی ہوئی حد تک انحصار کر رہی ہیں تاہم جیسے جیسے بین الاقوامی ادارے کمزور ہوتے جا رہے ہیں ان طاقتوں کا اثر مزید گھٹنے کا امکان ہے۔رپورٹ کے مطابق بڑی طاقتوں کے اثر میں کمی کے نتیجے میں درمیانی طاقتوں (Middle Powers) کی تعداد تقریباً دوگنی ہو گئی ہے ۔سال 1991 میں 9 کے مقابلے میں سال 2024 میں یہ تعداد 16 تک پہنچ چکی ہے۔IEP کی جامع تحقیقاتی درجہ بندی جو معاشی صلاحیت، فوجی قوت اور سفارتی اثر و تعلقات کو پرکھتی ہے سے ظاہر ہوتا ہے کہ اگرچہ سپر پاورز اوسط نامیاتی جی ڈی پی 20.6 ٹریلین ڈالر ہے (جو بڑی طاقتوں کے مقابلے میں تقریباً سات گنا زیادہ ہے) تاہم بڑی اور درمیانی طاقتوں کے درمیان فرق نمایاں طور پر کم ہو چکا ہے۔اب درمیانی طاقتیں جیسے برازیل، کینیڈا، جنوبی کوریا اور آسٹریلیا کو حقیقی پیمانوں پر دیکھیں تو روس (جو ایک بڑی طاقت شمار ہوتا ہے) سے زیادہ نامیاتی جی ڈی پی رکھتی ہیں۔رپورٹ کے مطابق درمیانی طاقتوں میں ایک واضح فرق ابھر کر سامنے آیا ہے۔"مستحکم" درمیانی طاقتیں (Established Middle Powers) جیسے آسٹریلیا، جنوبی کوریا،اسپین اور کینیڈا نے سال 2008 سے پہلے اپنا مقام مضبوط کر لیا تھا۔"ابھرتی ہوئی" درمیانی طاقتیں (Rising Middle Powers) جیسے متحدہ عرب امارات، میکسیکو،اسرائیل، انڈونیشیا اور ترکیہ نے 2008 کے بعد عالمی سطح پر نمایاں ترقی کی۔رپورٹ نے ان تین درمیانی طاقتوں (Middle Powers) متحدہ عرب امارات، انڈونیشیا اور ترکیہ کا تفصیلی جائزہ پیش کیا ہے جو اگلی دہائی میں سب سے زیادہ ترقی اور اثر حاصل کرنے کی بہتر پوزیشن میں ہیں۔رپورٹ کے مطابق متحدہ عرب امارات نے کامیابی کے ساتھ ایک تیل پر انحصار کرنے والے چھوٹے ملک سے ایک جدید عالمی لاجسٹک اور مالیاتی مرکز میں خود کو تبدیل کر لیا ہے۔اس نے اپنے 1.1 ٹریلین ڈالر کے خودمختار سرمایہ کاری فنڈ (Sovereign Wealth Fund) کے ذریعے سب سہارن افریقہ(Sub-Saharan Africa) میں غیر ملکی سرمایہ کاری کا سب سے بڑا ذریعہ بننے کا اعزاز حاصل کیا ہے۔انڈونیشیا دنیا کی نکل (Nickel) کی کان کنی کی آدھی سے زیادہ پیداوار فراہم کرنے والے ملک کے طور پر خود کو منوا رہا ہے تاکہ وہ عالمی الیکٹرک وہیکل سپلائی چین (Global EV Supply Chain) کا ایک لازمی حصہ بن سکے۔ترکیہ ایک مختلف مڈل پیش کرتا ہے۔
