• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ایران جنگ اور غلط پالیسیاں، ٹرمپ کے خلاف امریکا بھر میں مظاہرے، لاکھوں افراد سڑکوں پر یورپ میں بھی احتجاج

آج کا اخبار
اہم خبریں
29 مارچ ، 2026
واشنگٹن/نیویارک (جنگ نیوز/عظیم ایم میاں) — امریکی صدر ٹرمپ کی پالیسیوں اور ایران جنگ کے خلاف ہفتہ کے روز امریکا بھر میں بڑے پیمانے پر ’نو کنگز‘ احتجاجی مظاہرے ہوئے ہیں۔منتظمین کے مطابق تمام 50 ریاستوں میں 3,200 سے زائد ریلیاں منعقد ہوئیں اور لاکھوں افراد نے شرکت کی، جنہیں امریکا کی تاریخ کا سب سے بڑا پُرامن احتجاج بنانے کا ہدف رکھا گیا ہے۔ اس دوران یورپ کے مختلف ممالک میں بھی ایران جنگ اور دیگر امریکی پالیسیوں کے خلاف احتجاج ہوئے ہیں، مغربی خبر رساں ادارے رائٹرز کے مطابق نیویارک، لاس اینجلس، واشنگٹن اور منی سوٹا کے ٹوئن سٹیز میں مرکزی مظاہرے ہوئے، جبکہ اس بار چھوٹے شہروں میں بھی نمایاں اضافہ دیکھا جا رہا ہے۔’نو کنگز‘ تحریک، جسے Indivisible نے شروع کیا، آئندہ وسط مدتی انتخابات سے قبل سیاسی سرگرمیوں میں تیزی لا رہی ہے، خاص طور پر ریپبلکن ریاستوں میں۔منتظمین کا کہنا ہے کہ حالیہ مظاہروں کی بڑی وجہ ایران پر امریکی و اسرائیلی حملے اور ٹرمپ انتظامیہ کی داخلی پالیسیاں ہیں۔دوسری جانب وائٹ ہاؤس نے ان احتجاجوں کو غیر اہم قرار دیتے ہوئے مسترد کر دیا ہے۔تفصیلات کے مطابق واشنگٹن کے قریب شمالی ورجینیا میں سینکڑوں افراد Arlington National Cemetery کے قریب جمع ہوئے اور وہاں سے National Mall کی جانب مارچ کا آغاز کیا۔ راستے میں کچھ گاڑیوں کے ڈرائیوروں نے مظاہرین کی حمایت میں ہارن بجائے جبکہ بعض نے مخالفت بھی کی۔ایک مظاہرہ کرنے والے، 57 سالہ جان ایل، جو ورجینیا سے آئے تھے، نے کہا کہ ملک میں حالات ناقابل برداشت ہو چکے ہیں اور متوسط طبقہ زندگی گزارنے سے قاصر ہے۔ ان کے مطابق صدر ٹرمپ ایسے اصولوں کو توڑ رہے ہیں جن پر امریکا کا نظام قائم تھا۔یہ مظاہرے ایسے وقت میں ہو رہے ہیں جب امریکا اور اسرائیل کی جانب سے ایران پر حملوں کو چار ہفتے گزر چکے ہیں۔
اہم خبریں سے مزید