کراچی (اسٹاف رپورٹر) سابق کپتان انضمام الحق نے کہا ہے کہ نوجوان اعظم خان پر تنقید بلاجواز ہے ، اصل میں ان لوگوں کا احتساب کیا جائے جن لوگوں نے ان فٹ کھلاڑی کو ٹیم میں منتخب کیا ہے۔ اگر اعظم خان فٹ نہیں تو فٹ کھلاڑیوں نے ٹورنامنٹ میں کیا کردیا۔ دراصل پاکستان ٹیم کی سلیکشن ہی غلط تھی اور ٹیم کا توازن ہی دکھائی نہیں دیا۔ نجی ٹی وی پر انٹر ویو میں کہا کہ جب میں چیف سلیکٹر تھا ہم نے چیمپئنز ٹرافی سے قبل عمر اکمل کو وطن واپس بھیج دیا لیکن کچھ عرصے سے فٹنس ٹیسٹ ہی ختم کردیا گیا۔ جب محمد وسیم چیف سلیکٹر بنے ان کے دور میں یویو ٹیسٹ اور دیگر فٹنس ٹیسٹ ختم کردیئے گئے۔ ادھر ٹیسٹ اوپنر امام الحق نےکہا کہ بابر اعظم پاکستان کا کپتان ہے، آپ نہیں ماننا چاہتے، ٹھیک ہے، دنیا نے اُسے کنگ بنایا ہے آپ نہیں مانیں۔ بابر کیٹیم کیلئے خدمات اور اس حقیقت کا احترام کیا جانا چاہیے، وہ 250 سے زیادہ میچز کھیل چکے ہیں، ان اعداد و شمار کا بھی جائزہ لیں۔ سابق کرکٹر عمران نذیر نے موجودہ پاکستان ٹیم کو بزدل قرار دے دیا۔ انہوں نے کہا کہ بھارت کے خلاف میچ میں 120رنز کا ہدف تھا اور ٹیم کی ٹانگیں کانپ رہی تھیں۔