فرمان الہی
نماز کے اوقات
اسلام آباد(نمائندہ جنگ )قومی سلامتی کی خصوصی پارلیمانی کمیٹی کا ان کیمرااجلاس آج دن 11بجے ہوگا ‘عسکری قیادت پارلیمانی کمیٹی کو ملک کی موجوہ سکیورٹی صورتحال سے آگاہ کرے گی‘ اجلاس میں پارلیمان میں موجود تمام سیاسی جماعتوں کے پارلیمانی لیڈران اور ان کے نامزد نمائندگان اور متعلقہ کابینہ ارکان شرکت کریں گے جبکہ تینوں مسلح افواج کے سربراہان بھی شریک ہونگے‘اجلاس کے موقع پرپارلیمنٹ میں سکیورٹی کے سخت اورغیر معمولی انتظامات‘ قانون نافذ کرنے والے ادارے ہائی الرٹ‘غیر متعلقہ افرادکا داخلہ ممنوع قرار‘ میڈیا سمیت تمام انٹری کارڈز عارضی طور پر غیر موثر‘ریڈ زون کو ایف سی کے سپرد کر دیا گیا۔ ادھرپارلیمانی قومی سلامتی کمیٹی کے اجلاس میں شرکت کیلئے رات گئے تحریک انصاف کی سیاسی کمیٹی کا ہنگامی اجلاس ہواجس میں فیصلہ کیاگیاکہ عمران خان سے ملاقات نہ کرائی گئی تو قومی سلامتی کمیٹی اجلاس میں شرکت نہیں کریں گے ۔قبل ازیں پی ٹی آئی نے اسپیکر قومی اسمبلی کو شرکت کرنے والے اپنے ارکان کی فہرست بھجوا ئی تھی جس میں عمر ایوب ‘بیرسٹرگوہر خان‘ زرتاج گل‘ اسد قیصر‘ علی محمد خان‘شبلی فراز‘ سینیٹر ہمایوں مہمند ‘ سینیٹر علی ظفر‘حامد رضا، عون عباس‘زبیرخان، ثنااللہ مستی خیل، بشیر خان اور عامر ڈوگر کے نام شامل تھے۔تفصیلات کے مطابق قومی سلامتی کی خصوصی پارلیمانی کمیٹی کے اجلاس کا وقت تبدیل کردیا گیا جس کے مطابق اب اجلاس 18 مارچ(منگل) کو دن 11 بجے ہوگا۔ترجمان قومی اسمبلی کے مطابق اجلاس اِن کیمرہ ہو گاجس میں سکیورٹی صورتحال پر بریفنگ دی جائے گی۔اجلاس قومی اسمبلی ہال میں منعقد ہو گا۔علاوہ ازیں ایوان زیریں نے اسمبلی ہال کو قومی سلامتی کی پارلیمانی کمیٹی کے منگل والے دن اجلاس کیلئے مختص کرنے کی تحریک کی منظوری دیدی۔ دریں اثناءان کیمرہ اجلاس کے موقع پر پارلیمنٹ میں غیر معمولی سکیورٹی انتظامات کئے گئے ہیں ۔ ترجمان قومی اسمبلی کا کہنا ہے کہ اجلاس کے موقع پر سکیورٹی کے سخت اور غیر معمولی انتظامات کیے گئے ہیں‘اجلاس کے دوران پارلیمنٹ کی حدود میں کسی بھی قسم کی عکس بندی، ویڈیو گرافی اور فوٹو گرافی پر مکمل پابندی عائد کر دی گئی ہے۔ذرائع کے مطابق پارلیمانی کمیٹی اجلاس کے باعث قومی اسمبلی اور سینیٹ سیکرٹریٹ کو آج بند رکھنے کا فیصلہ کیا گیاہے۔سیکرٹریٹ ذرائع کے مطابق ملازمین کو آج چھٹی دے دی گئی‘ کمیٹی اراکین کے علاوہ تمام اراکین پارلیمنٹ کے داخلے پر بھی پابندی لگا دی گئی ہے۔
