معید پیرزادہ کا 1.05 ملین ڈالر مالیت کا امریکی گھر، ذرائع آمدن غیر واضح

اسلام آباد(فخردرانی )30 اکتوبر 2022 کو معید پیرزادہ نے پاکستان چھوڑا، جان کو لاحق خطرات کا دعویٰ کرتے ہوئے برطانیہ پہنچے، جہاں انہوں نے بیان دیا کہ وہ مسلسل مقام تبدیل کر رہے ہیں تاکہ خطرات سے بچ سکیں۔مگر حیرت انگیز طور پر، ملک چھوڑنے کے دس ماہ سے بھی کم عرصے میں وہ امریکہ کے مہنگے علاقے پوٹومیک، میری لینڈ میں ایک 2 کنال کا پرتعیش گھر خریدنے میں کامیاب ہو گئے، جس کی قیمت $1.05ملین (یعنی 10لاکھ 50ہزار ڈالر تھی۔معید پیرزادہ نے سابقہ ٹوئٹر X پر ایک پوسٹ میں دعویٰ کیا کہ انہوں نے برطانیہ میں اپنا پرانا خاندانی گھر فروخت کر کے یہ امریکی پراپرٹی خریدی۔تاہم، یوکے کمپنیز ہاؤس اور یوکے لینڈ رجسٹری سے حاصل شدہ عوامی ریکارڈ سے پتہ چلتا ہے کہ یہ جائیداد ان کی اہلیہ نے 2006میں خریدی اور اپریل 2023میں فروخت کی۔ لیکن یہ اثاثہ پاکستان میں کبھی ظاہر نہیں کیا گیا، جو پاکستان کے ٹیکس قوانین کے مطابق اثاثہ چھپانے کا واضح کیس بنتا ہے۔اس کے ساتھ ہی پاکستانی ریکارڈز سے معلوم ہوتا ہے کہ ان کی اہلیہ کی کوئی ظاہر شدہ آمدنی نہیں۔ صرف دس ماہ کے اندر، انہوں نے سیکیورٹی خطرات کا دعویٰ کیا اور پھر امریکہ کے پوش علاقے میں جائیداد خرید لی۔عوامی ریکارڈز سے پتہ چلتا ہے کہ ڈاکٹر معید حسن پیرزادہ — جو ایک صحافی اور یوٹیوبر ہیں — اور ان کی اہلیہ نے یہ لگژری گھر مشترکہ طور پر خریدا۔عمران خان کی برطرفی کے بعد، ڈاکٹر معید — جو برطانوی پاکستانی دوہری شہریت رکھتے ہیں — نے اپنے یوٹیوب چینل پر عمران خان کے حق میں مہم شروع کی۔ کچھ ہی عرصے بعد، انہوں نے گرفتاری کے خدشے کا اظہار کیا اور چپ چاپ پاکستان چھوڑ دیا۔https: //www.homes.com پر موجود عوامی معلومات کے مطابق، یہ 2کنال کا مکان 4 بیڈ روم، 2.5 باتھ روم، نجی دفتر، علیحدہ لیونگ اور فیملی رومز، ایک خوبصورت باغ اور دو الگ گیراج پر مشتمل ہے۔یہ مکان جولائی 2023میں لسٹ ہوا اور 15اگست 2023کو نجمیٰ ناہید پیرزادہ اور معید حسن پیرزادہ کے نام منتقل ہوا۔ اس کے بعد سے جائیداد کی مالیت میں $131,550کا اضافہ ہو چکا ہے، اور موجودہ اندازاً قیمت $1.2ملین بتائی جا رہی ہے۔homes.com کے مطابق، 1972میں تعمیر شدہ یہ مکان $965,000میں لسٹ ہوا تھا، مگر $1,055,000میں خریدا گیا۔نیو لینڈ ریکارڈز کے مطابق، معید پیرزادہ اور ان کی اہلیہ نے موومنٹ مورگیج کے ساتھ $550,000قرض) پر دستخط کیے، جس پر 6.78فیصد سود طے ہوا۔جب اس نمائندے نے یہ سوال بھیجا کہ:"آپ نے $505,000کی ڈاؤن پیمنٹ کس طرح کی؟"تو اس پر معید پیرزادہ نے X ٹوئٹر) پر جواب دیا کہ یہ رقم برطانیہ میں ان کے پرانے خاندانی گھر کی فروخت سے حاصل کی تھی۔ یوکے لینڈ رجسٹری کے مطابق، ان کی اہلیہ نے 13 اکتوبر 2006کو ایک جائیداد £420,000میں خریدی۔بعد ازاں، اس پر 3نومبر 2008کو ایک چارج (یعنی قرض یا گروی) بھی رجسٹر ہوا۔یہ جائیداد 13اپریل 2023کو فروخت کی گئی — یعنی امریکی گھر کی خریداری سے پانچ ماہ قبل۔فروخت کی قیمت £885,000تھی۔اس اثاثے کو 2006سے 2023 تک کبھی بھی پاکستانی ٹیکس حکام کو ظاہر نہیں کیا گیا، حالانکہ پیرزادہ اور ان کی اہلیہ 1997سے رجسٹرڈ ٹیکس دہندگان ہیں۔امریکی جائیداد کی خریداری سے قبل، پیرزادہ نے مارچ 2023میں ایم این پی ملٹی میڈیا ایل ایل سی کے نام سے ایک کمپنی رجسٹر کرائی۔ریاست میری لینڈ کے ریکارڈز کے مطابق، یہ کمپنی 3مارچ 2023کو رجسٹر ہوئی۔ستمبر 2023میں کمپنی کا پتہ تبدیل کر کے نئے خریدے گئے لگژری گھر پر منتقل کر دیا گیا۔تاحال اس کمپنی نے کوئی سالانہ مالیاتی رپورٹ جمع نہیں کرائی۔معید پیرزادہ اور ان کی اہلیہ دونوں برطانیہ کے شہری ہیں اور امریکہ میں ریزیڈنٹ ایلین (گرین کارڈ ہولڈر) کی حیثیت سے مقیم ہیں۔ پاکستان چھوڑنے سے قبل وہ گلوبل ویلج اسپیس نامی تنظیم چلاتے تھے۔معید پیرزادہ تو پاکستان میں ٹیکس دہندہ تھے، مگر ان کی اہلیہ نے 2022تک کبھی کوئی ٹیکس ریٹرن جمع نہیں کرایا۔ان کے برطانوی اثاثے، لینڈ رجسٹری کا ریکارڈ، اور پاکستان کے ٹیکس دستاویزات اس بات کی تصدیق کرتے ہیں کہ یہ جائیداد پاکستان میں ظاہر نہیں کی گئی۔اس نمائندے نے معید پیرزادہ کو 13نکات پر مشتمل سوالنامہ ای میل، امریکی فون نمبر، اور پاکستانی واٹس ایپ نمبر پر بھیجا، لیکن انہوں نے جواب دینے کے بجائے صرف ٹوئٹر پر بیان جاری کیا:"ہم نے برطانیہ میں اپنا پرانا خاندانی گھر فروخت کیا اور قانونی بینکنگ ذرائع سے رقم منتقل کی۔" بعد ازاں دی نیوز نے پیرزادہ اور ان کی اہلیہ کو چار اضافی سوالات بھیجے، مگر ابھی تک کوئی جواب موصول نہیں ہوا:وہ چارسوال مندرجہ ذیل تھے۔ کیا آپ اور آپ کی اہلیہ نجمیٰ ناہید پیرزادہ نے 13اکتوبر 2006کو NGL596292نمبر کی پراپرٹی £420,000میں خریدی تھی؟ اس وقت آمدنی کا ذریعہ کیا تھا؟کیا یہ جائیداد 13اپریل2023کو £885,000میں فروخت کی گئی؟ اس پر قرض (charge) کی رقم کتنی تھی ؟کیا آپ دونوں 1997 سے پاکستان میں بطور ٹیکس دہندہ رجسٹرڈ ہیں؟ 2006سے 2023کے درمیان کیا آپ نے یہ جائیداد پاکستانی ٹیکس حکام کو ظاہر کی؟