فرمان الہی
نماز کے اوقات
اسلام آباد(طاہر خلیل )پاکستان انسٹیٹیوٹ فار کانفلکٹ اینڈ سیکیورٹی اسٹڈیز (پی آئی سی ایس ایس) کی ماہانہ سیکورٹی رپورٹ کے مطابق جون کے مقابلے میں جولائی 2025 میں ملک میں شدت پسند حملوں میں معمولی اضافہ ریکارڈ کیا گیا۔ سیکورٹی رپورٹ کے مطابق جولائی میں شدت پسندی میں 5 فیصد اضافہ ،فورسز کے جانی نقصان میں 32 فیصد کمی ہوئی KPمیں سب سے زیادہ حملے ہوئے شدت پسندوں کی ہلاکتوں میں 49 فیصد اضافہ ہوا ۔پی آئی سی ایس ایس کے مطابق مارے جانے والوں میں 47 عام شہری، 36 سیکیورٹی فورسز کے اہلکار اور 18 شدت پسند شامل تھے جبکہ زخمیوں میں 90 عام شہری، 52 سیکیورٹی اہلکار، سات شدت پسند اور امن کمیٹی کا ایک رکن شامل ہے۔ رپورٹ میں کہا گیا ہے کہ سیکیورٹی فورسز نے بھی اپنی کارروائیاں تیز کرتے ہوئے 106 شدت پسندوں کو مارا اور 69 مشتبہ شدت پسندوں کو گرفتار کیا۔ ان کارروائیوں میں سات عام شہری بھی مارے گئے جبکہ ان کارروائیوں کے دوران صرف ایک سیکیورٹی اہلکار مارا گیا، جسے پی آئی سی ایس ایس نے حالیہ برسوں میں فورسز کی کارروائیوں کے دوران اہلکاروں کے جانی نقصان کا سب سے کم ماہانہ عدد قرار دیا، تاہم شدت پسند حملوں میں 36 اہلکار مارے گئے۔مجموعی طور پر جولائی میں شدت پسند حملوں اور سیکیورٹی فورسز کی کارروائیوں کے نتیجے میں 215 افراد مارے گئے جن میں 124 شدت پسند، 54 عام شہری اور 37 سیکیورٹی اہلکار شامل ہیں، جبکہ 199 افراد زخمی ہوئے جن میں 107 عام شہری، 56 سیکیورٹی اہلکار، 35 شدت پسند اور امن کمیٹی کا ایک رکن شامل ہے۔ رپورٹ کے مطابق شدت پسندوں نے کم از کم 14 افراد کو اغوا بھی کیا۔پی آئی سی ایس ایس کے مطابق جون 2025 کے مقابلے میں جولائی میں شدت پسند حملوں میں 5 فیصد اضافہ ہوا تاہم سیکیورٹی فورسز کے جانی نقصان میں 32 فیصد کمی ریکارڈ کی گئی۔ شہریوں کے مارے جانے کے واقعات میں 21 فیصد اضافہ جبکہ شدت پسندوں کے مارے جانے کے واقعات میں 49 فیصد اضافہ ہوا۔سیکورٹی رپورٹ کے مطابق خیبر پختونخوا اور اس کے قبائلی اضلاع میں سب سے زیادہ حملے ہوئے جہاں 82 میں سے 53 واقعات ریکارڈ ہوئے۔ بلوچستان میں 28 حملے رپورٹ ہوئے جبکہ پنجاب، سندھ، آزاد کشمیر اور اسلام آباد میں کوئی حملہ رپورٹ نہیں ہوا۔ گلگت بلتستان کے ضلع دیامر سے ایک حملہ رپورٹ ہوا۔
