فرمان الہی
نماز کے اوقات
بنوں ، لکی مروت(جنگ نیوز)بنوں میں سیکورٹی فورسز نے فیڈرل کانسٹیبلری (ایف سی) ہیڈکوارٹرز پر حملہ ناکام بناتے ہوئے فتنہ الخوارج کے 5دہشت گردوں کو ہلاک کردیا۔پاک فوج کے شعبۂ تعلقاتِ عامہ آئی ایس پی آر کے مطابق بھارتی اسپانسرڈ خوارج کی جانب سے سیکورٹی حصار کو توڑنے کی کوشش کی گئی۔حملے کو ناکام بناتے ہوئے بھارتی پراکسی ’فتنہ الخوارج‘ کے تمام 5 دہشت گردوں کو ہلاک کر دیا گیا۔ شدید جھڑپ میں فیڈرل کانسٹیبلری اور پاک فوج کے 6 جوان شہید ہوئے ہیں۔دوسری جانب لکی مروت میں بیگوخیل روڈ میلہ شہاب خیل کے قریب دہشت گردوں نے فائرنگ کرکے 2 پولیس اہلکاروں کو شہید کردیا۔ دونوں پولیس اہلکار ڈیوٹی پر جانے کے لئے نکلے تھے کہ دہشت گردوں کی فائرنگ کا نشانہ بن گئے۔ جبکہ حملہ آور فرار ہونے میں کامیاب ہوگئے۔ قبل ازیں آئی ایس پی آر کے مطابق بنوں میں سیکورٹی فورسز کے بر وقت، چوکس اور جرأت مندانہ ردِعمل کے باعث خوارج کے عزائم ناکام بنا دیئے گئے۔بھارتی اسپانسرڈ خوارج نے بارودی مواد سے بھری گاڑی دیوارِ حصار سے ٹکرائی، خودکش دھماکے کے نتیجے میں حصار کی دیوار کا کچھ حصہ گر گیا۔آئی ایس پی آر کا کہنا ہے کہ دھماکے سے قریبی سول انفرااسٹرکچر کو نقصان پہنچا جس سے 3 شہری زخمی ہوئے، جوانوں نے بہادری اور پیشہ ورانہ مہارت کا مظاہرہ کرتے ہوئے خوارج کو نشانہ بنایا، علاقے میں کلیئرنس آپریشن جاری رہے گا۔پاک فوج کے شعبۂ تعلقاتِ عامہ کا کہنا ہے کہ اس بھیانک اور بزدلانہ عمل کے مجرموں کو انجام تک پہنچایا جائے گا، سیکورٹی فورسز پوری قوم کے شانہ بشانہ بھارتی اسپانسرڈ دہشت گردی کے مکمل خاتمے کے لیے پُرعزم ہیں، ہمارے بہادر سپاہیوں اور شہریوں کی یہ لازوال قربانیاں ملک کے دفاع کے عزم کو مزید مضبوط کرتی ہیں۔لکی مروت میں پولیس کا کہنا ہے کہ بیگوخیل روڈ میلہ شہاب خیل کے قریب دہشت گردوں نے حملہ کیا، شہید اہلکار سمیع اللہ اور اسد خان کے جسد خاکی گورنمنٹ سٹی اسپتال منتقل کردیئے گئے ۔دونوں شہید اہلکار گاں بیگو خیل سے پولیس لائنز جا رہے تھے، افسوسناک واقعے کے بعد علاقے میں پولیس کی بھاری نفری نے سرچ آپریشن شروع کردیا ہے۔
