فرمان الہی
نماز کے اوقات
کراچی(اسٹاف رپورٹر/نیوز ڈیسک)امیر جماعت اسلامی پاکستان حافظ نعیم الرحمن نے کہاہے کہ فلسطین کا کوئی دوریاستی حل قبول نہیں، ریاست صرف ایک فلسطین اور قیادت صرف ایک حماس کی ہے،اسرائیل کو تسلیم کرنے کا سوچا تو حکمرانوں کا نان نفقہ بند کردینگے، وزیر اعظم پاکستان شہباز شریف اہل پاکستان کی رائے دیکھ لیں ،حماس کا مؤقف تسلیم کر کے اسکے ترجمان بنیں اور کسی بھی قسم کا بیرونی دباؤ قبول کئے بغیر پاکستان میں حماس کا دفتر کھولنے کا اعلان کریں، دیگر اسلامی ممالک میں بھی حماس کا دفتر کھولا جائے،پاکستان کے عوام اہل غزہ کے ساتھ ہیں۔ وہ جماعت اسلامی کے تحت امریکی پشت پناہی سے اسرائیلی افواج کی غزہ پر بمباری، خواتین و بچوں سمیت ہزاروں فلسطینیوں کی نسل کشی، صمود فلوٹیلا پر حملے کے خلاف اورا ہل فلسطین و حماس سے یکجہتی کیلئے شارع فیصل پر عظیم الشان ’یکجہتی غزہ مارچ‘ سے خطاب کررہے تھے۔مارچ میں مردو وخواتین، مختلف طبقات و مکاتب فکر اور شعبہ ہائے زندگی سے وابستہ لاکھوں افراد نے شرکت کی ۔فضا لبیک یا اقصیٰ لبیک یا غزہ کے نعروں سے گونجتی رہی ۔ غزہ مارچ سے ڈاکٹر اسامہ رضی، منعم ظفر خان ، سیف الدین ایڈوکیٹ، نوید علی بیگ، توفیق الدین صدیقی ، صدر مجلس وحدت المسلمین سندھ باقر زیدی ،سربراہ امت وحدت پاکستان علامہ امین شہیدی، رکن سندھ اسمبلی محمد فاروق ،ناظم کراچی اسلامی جمعیت طلبہ محمد آبش صدیقی نے بھی خطاب کیا۔ حافظ نعیم الرحمن نے مزید کہا کہ اپوزیشن و دیگر حکمران پارٹیاں بھی حماس اور اہل غزہ کی حمایت کریں اور کھل کر امریکا و اسرائیل کی مذمت کریں ،عمران خان کی بھی ذمہ داری ہے کہ وہ جیل سے دیگر اعلانات کی طرح حماس کی حمایت اور امریکا و اسرائیل کی مذمت کریں۔ اسرائیل کے نام کی کوئی بھی چیز ہے وہ مقبوضہ فلسطین ہے، پاکستان کا قومی مؤقف وہی ہے جو بانی پاکستان قائد اعظم محمد علی جناح کا تھا کہ اسرائیل ایک ناجائز ریاست ہے جسے کسی صورت تسلیم نہیں کیا جائیگا۔ حکمران امریکی غلامی اختیار اور امریکہ و اسرائیل سے قربت پیدا نہ کریں ،اسرائیل کو تسلیم کرنے یاابراہیم ایکارڈ کی طرف جانے کی جس نے بھی کوشش کی عوام اس کا ناطقہ بند کردیں گے ۔ فلسطین میں اصل قیادت حماس ہے باقی سب ڈھکوسلا۔ 7اکتوبر کوحماس کے مجاہدین سے اظہار یکجہتی کیلئے عالمی یوم احتجاج کے موقع پر ملک بھر میں 11بجے دن عوام سڑکوں پر نکلیں ۔عوام اپنے گھروں ، طلبہ اسکولوں و کالجوں ،وکلاء عدالتوں اور تاجر برادری اپنی دکانوں سے باہر نکل کر حماس کے مجاہدین سے اظہار یکجہتی کریں ۔21,22,23 نومبر کومینار پاکستان لاہور میں اجتماع عام ہوگا جس کا پیغام ہوگا کہ چہرے نہیں نظام کوبدلو ،بندوق کی حکمرانی،براہ راست مارشل لاء اور بالواسطہ مارشل لاء سے بھی ملک نہیں چل سکتا۔ حافظ نعیم الرحمن نے مزید کہا کہ ٹرمپ کی ایما پر فلسطینیوں کا قتل کیا جارہا ہے۔اقوام متحدہ مسلمانوں کا مسئلہ حل نہیں کرتی۔ اقوام متحدہ میں امریکہ کی اجارہ داری ہے۔ امریکہ کے کہنے پر اپنے موقف کو صحیح پیش نہ کرنا قوم کے ساتھ جھوٹ اور دھوکا ہے۔
