فرمان الہی
نماز کے اوقات
کراچی ( اسٹاف رپورٹر ) صوبائی وزیر قانون و پارلیمانی امور ضیا لنجارنے کہا ہےکہ کراچی کے ٹریفک کا نظام ابھی 20 فیصد بھی درست نہیں ہوا، 71 کروڑ روپے کے چالان کا نمبر تو ہے لیکن کلیکشن نہیں ہوئی، پہلی دفعہ معافی ہے دوسری دفعہ ڈبل چالان ہوگا، ان خیالات کا اظہار انھوں نے سندھ اسمبلی کے ایوان کی کارروائی کے دوران قائد حزب اختلاف علی خورشیدی کے پوائنٹ آف آرڈر پر کیا،علی خورشیدی نےاپنے ایک پوائنٹ آف آرڈر پر کہا تھا کہ اس شہر میں ای چالان کا مسئلہ بہت سنگین شکل اختیار کرگیاہے، بدقسمتی سے جب کراچی میں ای چالان کا متعارف کرایا گیا، یہ فیصلہ بڑی عجلت میں کیا گیا، بائیک چلانے والے غریب لوگ ہوتے ہیں وہ کہاں سے ہزاروں روپے کے چالان بھریں گے ،انہوں نے کہا کہ میری گذارش ہے کہ اس معاملے پارلیمانی کمیٹی تشکیل دی جائے کیونکہ پا رلیمان سپریم ہے۔ انہوں نے کہا کہ کراچی کا شمار دنیا کے تین بدترین شہروں میں ہوتا ہے،انہوں نے مطالبہ کیا کہ جرمانے کم کریں، کراچی کے علاوہ بھی ای چالان ہونا چاہیے، قائد حزب اختلاف نے کہا کہ ایک منظم سازش کے تحت اب شہر میں ٹریفک جام ہوتا ہے، مجھے گھر سے اسمبلی آنے میں پونے دو گھنٹے لگ گئے ہیں،وزیر قانون و پارلیمانی امور ضیا لنجار نے قائد حزب اختلاف کے پوائنٹ آف آرڈر کا جواب دیتے ہوئے کہا کہ ہم کراچی کے شہریوں کو فائدہ پہنچانا چاہتے ہیں، اس شہر میں ٹریفک جام اور حادثات ہوتے تھے،ہمارے پاس موٹر سائیکل سوار کے لیے ڈھائی ہزار روپے چالان ہے۔ ہم ان کی جان بچانا چاہتے ہیں ہیلمٹ کو اسی لئے لازمی قرار دیا ہے، حیدرآباد اور سکھر میں بھی چالان کر رہے ہیں، لائسنس چیک کئے جا رہے ہیں، ٹریفک کے نظام کو درست کر رہے ہیں۔
