فرمان الہی
نماز کے اوقات
کراچی، اسلام آباد (نیوز ایجنسی، نیوز رپورٹر) پاک بحریہ نے شمالی بحیرہ عرب میں ایک جامع مشق کے ذریعے ،بحری جنگ کے جدید تقاضوں کے مطابق روایتی اور خودکار پلیٹ فارمز کی حربی صلاحیتوں کا بھرپور مظاہرہ کیا۔ اس مشق کے دوران ورٹیکل لانچنگ سسٹم کے ذریعے زمین سے فضا میں طویل فاصلے تک مار کرنے والے میزائل LY-80(N) کی کامیاب فائرنگ کی گئی، جس سے پاک بحریہ کے جدید فضائی دفاعی نظام کی طویل فاصلے تک دشمن کو نشانہ بنانے کی صلاحیت کی تصدیق ہوئی،وزیراعظم محمد شہباز شریف نے ایل وائی-80 (این) میزائل اور لوئٹرنگ میونیشن کے کامیاب تجربے پر پاک بحریہ کو خراج تحسین پیش کیا ہے۔تفصیلات کے مطابق مشق کے دوران LY-80(N)میزائل نے کامیابی سے فضائی ہدف کو نشانہ بنایا جوپاک بحریہ کی مضبوط فضائی دفاعی صلاحیتوں کا مظہر ہے۔مشق کے دوران لوئٹرنگ میونیشنز کے ذریعے سطحِ سمندر پر موجود اہداف کو بھی کامیابی سے ٹارگٹ کیاگیا جس سے پاک بحریہ کی اہداف کو درستگی سے نشانہ بنانے کی صلاحیت اور جدید بحری جنگ میں لوئٹرنگ میونیشنزکی افادیت ثابت ہوئی۔ علاوہ ازیں کھلے سمندر میں خود کاربحری جہاز کے کامیاب آپریشنزکاتجربہ بھی کیا گیا، جو خودکار بحری ٹیکنالوجی میں ایک اہم پیش رفت ہے۔ ان تجربات کے ذریعے اس پلیٹ فارم کی اہم مشنز میں موثر اور تیز رفتار کارکردگی کی تصدیق کے علاوہ مینوریبلٹی، درست نیویگیشن اورہر طرح کیموسمی حالات میں آپریشن کی صلاحیت کی بھی توثیق ہوئی۔ خودکار ویسلز خفیہ کاروائی کے لیے کم خطرے کے ساتھ موثر ترین حل ہیں۔کمانڈر پاکستان فلیٹ، وائس ایڈمرل عبدالمُنِیب نے اس مشق کا مشاہدہ کیا، جس میں پاک بحریہ کے جدید سسٹمز کے مؤثر استعمال کا عملی مظاہرہ کیا گیا۔چیف آف دی نیول اسٹاف، ایڈمرل نوید اشرف نے پاک بحریہ کے افسران اور جوانوں کی پیشہ ورانہ مہارت اور آپریشنل صلاحیتوں کو سراہا۔ انہوں نے ہر قسم کے حالات میں پاکستان کے سمندری دفاع کو یقینی بنانے اور قومی بحری مفادات کے تحفظ کے لیے پاک بحریہ کے غیر متزلزل عزم کا بھی اعادہ کیا۔دریں اثناء اپنے بیان میں وزیر اعظم شہباز شریف نے میزائل و میونیشن کی تیاری میں شریک ٹیم کی کاوشوں کی تعریف کی ہے۔ وزیر اعظم نے شمالی بحیرۂ عرب میں کامیاب اور جامع مشق پر وزیرِ اعظم کی پاک بحریہ کی قیادت اور افسران و جوانوں کو مبارکباد. دی ہے۔
