یوم پاکستان، ملتان سمیت مختلف شہروں میں پرچم کشائی کی تقاریب اور ریلیاں

ملتان‘ وہاڑی‘ خانیوال، کوٹ ادو‘ جہانیاں‘ دھنوٹ (سٹاف رپورٹر‘ نمائندگان جنگ‘ نامہ نگاران) ملتان سمیت جنوبی پنجاب کے مختلف شہروں میں یوم پاکستان قومی جوش و جذبے سے منایا گیا، پرچم کشائی سمیت دیگر خصوصی تقاریب اور ریلیاں، ملک کی سلامتی و خوشحالی کے لیے خصوصی دعائیں، تفصیلات کے مطابق گزشتہ روز یوم پاکستان کے موقع پر ملتان میں ڈپٹی کمشنر آفس میں مرکزی تقریب کا انعقاد کیا گیا، جہاں پرچم کشائی اور پریڈ کا اہتمام کیا گیا، پولیس، ریسکیو اور سول ڈیفنس کے چاق و چوبند دستوں نے قومی پرچم کو سلامی پیش کی، تقریب کی صدارت کمشنر ملتان عامر کریم خاں اور ریجنل پولیس آفیسر محمد عثمان اکرم گوندل نے کی جب کہ ایڈیشنل ڈپٹی کمشنر فنانس، ضلعی افسران اور سول سوسائٹی کے نمائندگان کی بڑی تعداد بھی شریک ہوئی، کمشنر ملتان اور آر پی او نے اپنے خطاب میں کہا کہ یوم پاکستان اس عظیم دھرتی کے تحفظ کے عزم کو مزید پختہ کرتا ہے، پوری قوم سیسہ پلائی دیوار کی مانند اپنی افواج کے ساتھ کھڑی ہے، یوم پاکستان کے موقع پر ضلع کونسل وہاڑی میں پرچم کشائی کی تقریب منعقد ہوئی ، ایڈیشنل ڈپٹی کمشنر جنرل غلام مرتضی ٰنے پرچم کشائی کی، پولیس اور ریسکیو 1122 کے چاق و چوبند دستوں نے قومی پرچم کو سلامی پیش کی اور قومی ترانہ پیش کیا گیا، اس موقع پر اسسٹنٹ کمشنر وہاڑی انعم اکرم، ڈی ایس پی رضوان خان اور دیگر افسران بھی موجود تھے، ضلعی انتظامیہ خانیوال کے زیر اہتمام یوم پاکستان کے موقع پر ضلع کونسل میں مرکزی پرچم کشائی کی تقریب منعقد کی گئی، اس موقع پر ضلعی انتظامیہ، پولیس، سول ڈیفینس، ریسکیو اور دیگر متعلقہ اداروں کے چاق و چوبند دستے شریک ہوئے اور قومی پرچم کو سلامی دی، ڈپٹی کمشنر ملیحہ رشید اور ڈی پی او محمد عابد نے تقریب کی قیادت کی، انہوں نے اس موقع پر خطے کی موجودہ صورتحال میں اتحاد اور بھائی چارے کے پیغام پر زور دیااور تقریب میں ملک کی ترقی اور استحکام کے لیے خصوصی دعا بھی کی گئی،کوٹ ادو میں ضلع انتظامیہ کی قیادت میں پرچم کشائی کی تقریب منعقد ہوئی، جس کے بعد شہر میں ایک پرجوش ریلی نکالی گئی، اس موقع پر پولیس افسران اور اہلکاروں کی بڑی تعداد نے شرکت کی،جہانیا ں میں میونسپل کمیٹی میں پرچم کشائی کی تقریب کا انعقاد کیا گیا،تقریب میں سرکاری و غیر سرکاری اداروں کے سربراہان اورسول سوسائٹی نے شرکت کی ،اس موقع پر واک کا اہتمام کیا گیا اور ملکی سلامتی، ترقی و خوشحالی کے لیے دعابھی کی گئی،یوم پاکستان کے موقع پر چئیرمین سرائیکستان نوجوان تحریک مہر مظہر عباس کات نے کہا ہے  کہ آج کا دن پوری قوم کے لیے ایک نئے عہد کرنے کا دن ہے تاکہ ہم اپنے بزرگوں کی مملکت خدا داد کے لیے دی گی قربانیوں کو یاد کرتے ہوئے اپنے ملک کی بقاء کے لیے جذبہ ایمانی پیدا کر کے وطن کی ترقی اور حفاظت کے لیے عہد کریں،جامعہ زکریا ایمپلائز ایسوسی ایشن کے سینئر رہنما خرم عظیم نے کہا ہے کہ23 مارچ  ہمیں وطنِ عزیز کی سالمیت، اتحاد اور ترقی کے لیے اپنے عزم کو مزید مضبوط کرنے کی یاد دلاتا ہے،یوم پاکستان کے حوالہ سے پیغام دیتے ہوئے وائس چانسلر نشتر میڈیکل یونیورسٹی پروفیسر ڈاکٹر مہناز خاکوانی کا کہنا ہے کہ جب ہم 23مارچ کو یوم پاکستان کے طور پر مناتے ہیں تو ہمیں اپنی ذمہ داریوں کا احساس ہونا چاہیے تاکہ پاکستان کو ترقی کی راہ پر گامزن کر سکیں اور یہ دن ہمیں اپنے اسلاف کی بے مثال قربانیوں کی یاد دلاتا ہے،پرنسپل نشتر میڈیکل کالج پروفیسر ڈاکٹر راشد قمر راؤ نے پیغام دیا ہے کہ اس وقت پوری قوم کو متحد ہو کر اپنے دفاعی اداروں کے پیچھے کھڑے ہونا ہے، میڈیکل سپرنٹنڈنٹ نشتر اسپتال ڈاکٹر راؤ امجد علی خاں کا یوم پاکستان کے حوالہ سے کہنا تھا کہ علامہ اقبال نے ہمارے لیے ایک آزاد وطن کا خواب دیکھا اور قائد اعظم محمد علی جناح نے پاکستان کی بنیاد رکھی اور اس خواب کی تعبیر کی اور پاکستان کی تعمیر و ترقی اور ملکی سلامتی اور معاشی ترقی کے لیئے پاک فوج کا کردار ناقابل فراموش ہے،پاکستان مسلم لیگ فنکشنل پنجاب ملتان کے زیر اہتمام پیر صفت اللہ شاہ راشدی کی یاد  اور یوم قرارداد پاکستان 23 مارچ کی تقریب منعقد ہوئی جس کی صدارت پنجاب کے سینئر نائب صدر الحاج محمد اشرف قریشی نے کی مہمان خصوصی حاجی نصیر الدین نسیم اور سردار عبدالمجید خان راجپوت ایڈوکیٹ تھے تقریب میں چوہدری محمد شفیع محمد زبیر خان تہیم مبشر وسیم لودھی شیخ محمد جعفر چودری محمد سرور علی شیخ محمد اصف ایوب رانا سہیل مصطفی ملک محمد سعید رانا مہر حسین رانا محمد جاوید نون محمد صنوبر خان حاجی محمد اسلم قادری صوفی محمد سبحان جی حامد علی اکرام کے علاوہ دیگر ذمہ داران نے شرکت کی ،دھنوٹ کی سیاسی و سماجی شخصیت  اور سابق چیئرمین یونین کونسل دھنوٹ رانا حاجی محمد اقبال نے صحافیوں سے گفتگو کرتے ہوئے  کہا ہے کہ 23مارچ کا دن قراردادلاہور کی یاد دلاتا ہے، جو 1940 میں لاہور کے مینار پاکستان کے مقام پر پیش کی گئی،  انہوں نے مزید کہا کہ یومِ پاکستان ہمیں اتحاد، ایمان اور نظم و ضبط کا پیغام دیتا ہے، ہمیں چاہیے کہ ہم اپنے ملک کی ترقی، خوشحالی اور استحکام کے لیے محنت کریں اور اس کے دفاع کیلئے ہمیشہ تیار رہیں۔