فرمان الہی
نماز کے اوقات
اسلام آباد (خالد مصطفیٰ) عالمی بینک داسو پراجیکٹ کیلئے1 ارب ڈالر کا نیا قرض فراہم کریگا، یہ قرض1.7ٹریلین روپے کی لاگت سے نظرثانی شدہ پی سی ون کی منظوری کے بعد دیا جائے گا۔ تفصیلات کے مطابق ای اے ڈی کے سینئر عہدیدار نے دی نیوز کو بتایا کہ ورلڈ بینک باضابطہ طور پر داسو ہائیڈرو پاور پراجیکٹ کے پہلے مرحلے کے لیے 1 ارب ڈالر کا نیا قرض فراہم کرے گا۔ یہ قرض ترمیم شدہ پی سی-1 کی منظوری کے بعد دیا جائے گا، جس میں نئے ٹائم لائنز شامل کیے گئے ہیں۔ منصوبے کے پہلے مرحلے کی لاگت190.1فیصد اضافے کے ساتھ586ارب روپے سے بڑھ کر1700ارب روپے تک پہنچ گئی ہے، جس کی بنیادی وجوہات زمین کے حصول میں تاخیر، سیکورٹی خدشات، اور امریکی ڈالر کی قدر میں178فیصد اضافہ ہیں۔ پہلے مرحلے کا یہ منصوبہ2160میگاواٹ بجلی پیدا کرے گا۔ تاہم منصوبے کے دوسرے مرحلے کی تکمیل کے بعد یہ4320میگاواٹ بجلی پیدا کرے گا۔ واپڈا نے منصوبے کا ترمیم شدہ پی سی-1 تیار کر لیا ہے، جو اب وزیر برائے آبی وسائل کے پاس موجود ہے اور جلد ہی منظوری کے لیے پلاننگ کمیشن کو بھیجا جائے گا۔
