فرمان الہی
نماز کے اوقات
اسلام آباد ( رانا غلام قادر ) وفاقی بیور کریسی کیلئے اہم خبر ہے کہ وفاقی افسران کی گریڈ 20 اور 21 میں ترقی کیلئے شیڈول سنٹرل سلیکشن بورڈ کا 4 روزہ اجلاس آج 11مارچ سے شروع ہو گا۔سنٹرل سلیکشن بورڈ کا اجلاس 12، 13اور 14 مارچ کو جاری رہے گا۔بورڈ اجلاس کی مرتب کردہ سفارشات کی حتمی منظوری وزیراعظم دیں گے جس کے بعد اسٹیبلشمنٹ ڈویژن کی جانب سے ہر افسر کی ترقی اور تقرر و تبادلے کے حوالے سے نوٹیفکیشن جاری کئے جائیں گے۔سنٹرل سلیکشن بورڈ اجلاس میں ایک ہزار کے قریب افسروں کو گریڈ 20 اور 21 میں ترقی دی جائے گی۔ سنٹرل سلیکشن بورڈ اجلاس کی صدارت چیئرمین فیڈرل پبلک سروس کمیشن لیفٹیننٹ جنرل(ر) اختر نواز ستی کریں گے جبکہ سینیٹر سعدیہ عباسی، سنیٹر سلیم مانڈوی والا، ایم این اے جاوید حنیف خان، پنجاب سے سیکرٹری خزانہ امداد اللہ بوسال، سندھ سے گریڈ 22 کی ریٹائرڈ بیوروکریٹ رابعہ جویریہ آغا، خیبر پختونخوا سے سیکرٹری بحری امور ڈویژن ظفر علی شاہ، بلوچستان سے گریڈ 22 کے ریٹائرڈ افسر غیاث الدین اور سیکرٹریٹ گروپ گریڈ 22 کے ریٹائرڈ افسر پرویز جونیجو، سیکریٹری اسٹیبلشمنٹ ڈویژن انعام اللہ خان دھاریجو، سیکرٹری کابینہ ڈویژن اور چاروں صوبائی چیف سیکرٹریز بورڈ ممبر نامزد کئے گئے ہیں، علاوہ ازیں پولیس افسران کی ترقی کے کیسز کیلئے صوبوں کے آئی جی پولیس، وفاقی سیکرٹری داخلہ بورڈ ممبر نامزد کئے گئے ہیں جبکہ جس وزارت کا پروموشن کیس ہو گا اُس کے سیکرٹری بھی اجلاس میں شریک ہوں گے، مزید برآں ڈی جی انٹیلی جینس بیورو اور ڈی جی آئی ایس آئی اپنے اپنے اداروں کے افسروں کے پروموشن کیسز کے موقع پر شریک ہوں گے، بورڈ اجلاس تمام سروسز، گروپس، ایکس کیڈر افسران کو گریڈ 20 اور21 میں ترقی دے گا، آج سینٹرل سلیکشن بورڈ اجلاس کے پہلے دن وزارتِ خارجہ امور کے گریڈ 20سے 21میں ترقی کیلئے پینل پر موجود 30 افسران جبکہ گریڈ 19 سے 20 میں ترقی کیلئے پینل پر موجود 42 افسران کے کیسز پر غور کیا جائے ۔مزید برآں وزیراعظم دفتر (سرمایہ کاری بورڈ)، وزارت نیشنل فوڈ سیکیورٹی کے کیسز زیرِ غور آئیں گے، ایجنڈے کے مطابق 14 مارچ کو اجلاس کے چوتھے دن وزارت تجارت، وزارتِ ریلوے، فیڈرل پبلک سروس کمیشن، وزارتِ وفاقی تعلیم کے تحت افسران کی ترقی کے کیسز پر غور ہو گا، یاد رہے کہ سنٹرل سلیکشن بورڈ کا اجلاس آخری اجلاس اگست 2023 میں منعقد ہوا تھا۔
