• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

غزہ پر اسرائیلی بمباری میں مزید 109 شہید، یمن پر بھی فضائی حملے

آج کا اخبار
اہم خبریں
17 مئی ، 2025
کراچی(نیوزڈیسک)فلسطینی وزارت صحت کے مطابق غزہ میں گزشتہ 24گھنٹوں میں اسرائیلی طیاروں کی بمباری اور فورسز کے کے حملوں میں 109 فلسطینی شہید جبکہ 216زخمی ہوگئے۔ جنگ بندی کے خاتمے کے بعد اسرائیلی حملوں میں 2 ہزار 985 فلسطینی شہید اور 8 ہزار 173 زخمی ہوچکے ہیں ، اسرائیلی اخبار کا کہنا ہے کہ غزہ پر ہر چار منٹ میں اوسطاً ہر چار منٹ میں ایک فضائی حملہ ہورہا ہے ، اسرائیلی طیاروں نے یمن میں حدیدہ کی بندرگاہ اور حوثیوں کے زیر انتطام الصلیف کی بندرگاہ پر بمباری کی ہے ، بمباری سے حدیدہ میں تیل کے کنوؤں میں آگ لگ گئی ہے۔ عرب میڈیا کے مطابق فلسطینی وزارت صحت نے اپنے بیان میں کہا کہ جمعہ کے روز اسرائیلی بمباری میں 93 فلسطینی شہید اور 200 سے زائد زخمی ہوئے جبکہ گزشتہ 24گھنٹوں میں 109فلسطینی شہید ہوچکے ہیں ۔ فلسطینی وزارت صحت کے مطابق مارچ میں جنگ بندی کے خاتمے کے بعد اسرائیلی حملوں میں 2 ہزار 985 فلسطینی شہید اور 8ہزار173زخمی ہوئے۔ فلسطینی وزارت صحت کے مطابق غزہ میں اسرائیلی فورسز کی بربریت کے نتیجے میں سات اکتوبر 2023 سے اب تک 53 ہزار 119 فلسطینی شہید اور ایک لاکھ20ہزار214زخمی ہوگئے۔دریں اثنا اسرائیل کا یورپین اسپتال میں حماس کے کمانڈ سینٹر کا دعویٰ جھوٹا نکلا۔ برطانوی اور ترک ٹی وی نے تحقیقات سے ثابت کیا ہے کہ اسرائیل نے نقشے میں اسپتال کے ساتھ جو حماس کی سرنگ بتائی ہے وہ جگہ اور دھماکے کا نشانہ بننے والا اسپتال ایک دوسرے سے کافی دور ہیں۔اسرائیلی بنکر بسٹر بموں سے خوفناک تباہی ہوئی اور عورتوں و بچوں سمیت 80 سے زائد افراد شہید ہوئے۔علاوہ ازیں امریکی صدر ٹرمپ نے غزہ کی صورتحال پر کہا وہاں بہت سے لوگ بھوک سے مر رہے ہیں، غزہ کے لیے اگلے ماہ تک بہت سی اچھی چیزیں ہونے جا رہی ہیں۔
اہم خبریں سے مزید