فرمان الہی
نماز کے اوقات
کراچی (عبدالماجد بھٹی) پاکستان سپر لیگ انتظامیہ اور فرنچائزمالکان کے درمیان اہم اجلاس منگل کو طلب کیا گیا ہے۔ ذمے ذرائع کے مطابق مالکان نے پی ایس ایل مینجمنٹ سے ملاقات میں اجلاس بلانے کا مطالبہ کیا تھا۔ جو تسلیم کر لیا گیا۔ پی ایس ایل 2026 اور 2027 سے متعلق خدشات کا اظہار کیا تھا ان تمام تحفظات پر اجلاس میں غور کیا جائے گا ، پی سی بی حکام اپنے موقف سے آگاہ کریں گے۔ فرنچائز مالکان نے کمرشل امور، ایونٹ ونڈو اور ای وائی ایویلیوایشن رپورٹ پر بریفنگ کا مطالبہ کیا ہوا ہے۔ ذمے دار ذرائع کا کہنا ہے کہ مالکان نے دو سالہ ٹائٹل اسپانسرشپ معاہدے کے طریقہ کار پر بھی بریفنگ مانگی ہے۔ اجلاس نیشنل کرکٹ اکیڈمی میں ہوگا جس میں چھ فرنچائزز بشمول ملتان سلطانز کو مدعو کیا گیا ہے۔ بورڈ نے پاکستان سپر لیگ میں مزید دو نئی ٹیمیں شامل کرنے کا فیصلہ کیا ہے جبکہ 10 سال مکمل ہونے پر رواں ماہ فرنچائزز کے ساتھ نیا معاہدہ کیا جائے گا۔ پاکستان سپر لیگ کے چیف ایگزیکٹو آفیسر سلمان نصیر کا کہنا تھا کہ پی ایس ایل میچز کا دائرہ کار اب لاہور، ملتان، راولپنڈی اور کراچی کے ساتھ ساتھ فیصل آباد اور پشاور تک بھی پھیلایا جائے گا۔ پی ایس ایل کی نئی ٹیم کیلئے نومبر میں ٹینڈر جاری کیے جائیں گے، دلچسپی لینے والے مختلف شہروں کے ناموں میں سے اپنی مرضی کے نام کا انتخاب کر سکیں گے۔
