فرمان الہی
نماز کے اوقات
کراچی (ٹی وی رپورٹ) جیو کے ”نیا پاکستان“ میں وفاقی وزیر پٹرولیم علی پرویز ملک نے کہا ہے کہ پٹرولیم صارفین پر لیوی میں اضافہ ایک آپشن ہے تاہم ابھی فیصلہ نہیں ہوا۔ایڈیشنل سیکرٹری جنرل پی ٹی آئی فردوس شمیم نقوی نے کہا کہ سیاسی کمیٹی کا بنیادی مقصد پوری پی ٹی آئی کو ایک منظم جماعت بنانا ہے۔میزبان شہزاد اقبال نے اپنے تجزیہ میں کہا کہ تحریک انصاف نے نئی سیاسی کمیٹی کا اعلان کر کے اپنی صفوں میں اختلافات کو جنم دیا ہے۔ اقوام متحدہ کے خصوصی نمائندے نے عمران خان کے ساتھ جیل میں ناروا سلوک کی اطلاعات پر تشویش کا اظہار کیا اور فوری اور موثر کارروائی کا مطالبہ کیا۔پیٹرولیم ڈویژن نے تجویز دی ہے کہ گردشی قرضے کے خاتمے کے لئے پیٹرول اور ڈیزل پر پانچ روپے فی لیٹر لیوی عائد کی جائے۔ اس کا مطلب یہ ہے کہ ہر پاکستانی خواہ اس کے پاس گیس کا کنکشن ہو یا نہ ہو حکومت کی غلط پالیسیوں کا بوجھ اٹھائے گا۔ وفاقی وزیر پٹرولیم علی پرویز ملک نے کہا کہ گیس کے گھریلو صارفین ایک کروڑ کے قریب ہیں ۔ اٹھارہ سو ارب کا ہم نے ایندھن استعمال کر لیا ہے اس کی ادائیگی کرنی ہے یا نہیں کرنی ہے میرے لئے نقصان کو مینج کرنا اس وقت بڑا چیلنج ہے توانائی کے شعبے میں گردشی قرض کا مسئلہ حل کرنا ہے آپ کے پاس کوئی بہتر حل ہے تو بتادیں۔
