فرمان الہی
نماز کے اوقات
اسلام آباد (کامرس رپورٹر/مہتاب حیدر) پاکستان اور اسلامی ترقیاتی بینک کے درمیان 603 ملین ڈالر کے 3معاہدوں پر دستخط، یہ قرضے سکھر حیدرآباد موٹروے، غربت مٹاؤ پروگرام اور اے جے کے میں تعلیم کیلئے استعمال کئے جائیں گے۔ تفصیلات کے مطابق پاکستان اور اسلامی ترقیاتی بینک نے 603ملین ڈالر کے قرضوں کے تین معاہدوں پر دستخط کر دئیے۔ ان معاہدوں میں موٹروے کے ایک حصے کی تعمیر اور سماجی شعبے کے دو اہم منصوبے شامل ہیں۔ اقتصادی امور ڈویژن کی جانب سے جاری کردہ ایک سرکاری اعلامیے کے مطابق، اسلامی ترقیاتی بینک (آئی ایس ڈی بی) تقریباً 603 ملین ڈالر مالیت کے تین قرضے فراہم کرے گا۔ یہ قرضے ایم-6 سکھر- حیدرآباد موٹروے منصوبے، انتہائی غریب اور سیلاب سے متاثرہ گھرانوں کے لیے غربت سے نجات کا منصوبہ (پی جی ای پی)، جو منتخب انتہائی پسماندہ اضلاع اور سیلاب متاثرہ علاقوں میں نافذ کیا جائے گا، اور آزاد جموں و کشمیر کے لیے اسکول سے باہر بچوں کے منصوبے کی مالی معاونت کے لیے استعمال کیے جائیں گے۔ یہ معاہدے اسلام آباد میں اعلیٰ سطحی مذاکرات کے بعد باضابطہ طور پر طے پائے۔ اسلامی ترقیاتی بینک (IsDB) کی جانب سے شارٹ ٹرم فنانسنگ (قلیل مدتی مالیات) کے طور پر کموڈٹی فنانسنگ کی مد میں کیے گئے 700 ملین ڈالر کے ایک اور عہد میں سے، بینک نے رواں مالی سال کے پہلے پانچ مہینوں میں اب تک 383.78 ملین ڈالر جاری کر دیے ہیں۔
